Wan buh syntiew u Myntri Rangbah ia u Brother Eric D’Souza u ba dei ruh u nonghikai jong u barim

Ki riewniam jong ka Jingïasyllok Christians Brothers kiba ju pyniaid ia ka pule ka puthi ha St. Edmund’s Higher Secondary School bad ha St. Edmunds College ha kane ka Jylla Meghalaya ki la iam pangnud bad dap da ka jingsngewsih kaba khraw halor ka jingkhladnoh jong u Brother Eric Steve D’Souza ha kaba ia ka met jong une u riewniam la tep donburom ha ka 16 tarik Risaw, 2024.
Shwa ban rah leit ontep sha u lum jingtep, la pynlong shwa ia ka Mass Bakhuid ba la pynbynta da u Archbishop jong ka Jyllaniambah Shillong u Most Rev. Victor Lyngdoh ha ryngkat ka jingrynsan lang jong u Vicar General u Rev. Fr. Richard M. Majaw bad kiwei kiwei ki Lyngdoh Sohblei bad la sakhi ruh ba u Myntri Rangbah ka Jylla bad ki khynnah skul barim kiba la shah hikai ha u Brother Eric D’Souza mynba ki dang long tang ki khynnah pule jong ka St. Edmund’s School, Shillong ki la leit ban ai khublei khatduh ia une u nonghikai bad ban pynpaw ruh ia ka jingsngewsih kaba khraw halor ka jingduhnoh ia u Brother D’Souza uba la noh synniang shikatdei eh ha ka pule ka puthi ha kane jylla Meghalaya da kaba wanrah ruh shibun ki buit hikai kiba thymmai ha ka kam hikai skul bad nalor ba u la long ruh u nongseng ïa ka Providence School ha Meghalaya, kaba dei ka shlem pule kaba plie lad ïa ki khynnah kiba wan na ki longïing kiba kham duna ka ïoh ka kot.
Ha baroh shi lynter ka jingim kum u riewniam, u Brother D’Souza u la hikai ha ki skul ba la pynïaid da ka jingïasyllok Christian Brothers ha West Bengal, New Delhi, Mangalore, Assam, bad Meghalaya ha kaba bun na ki khynnah skul ki la kiew bad ki la tynshain bha ha ka pule puthi.