Shillong | 17 Naitung 2025 — Ha ka jingkynmaw burom ba 190 snem ka sngi iap u Tirot Sing Syiem, u Wandonbok Jyrwa, nongialam ka East Khasi Hills Taxi Drivers’ Union, u la pynpaw ba ka riti u Tirot Sing ka dei ban pynshlur ïa ki paidbah ban ieng pyrshah ïa ka hokduna bad ka jyrsieh ha ka imlang sahlang.
“U Tirot Sing um dei tang u khla pateng ha ki kot khana, hynrei u dei u mynsiem jong ngi ki nongtrei bylla, ki nongniah kali, ki nongdie madan bad ki samla kiba iakhun man ka sngi ban im ha ka burom,” la ong u Jyrwa.
U la kylli ruh, “Hangno ka jingbishar hok kaba u Tirot Sing u la iakhun na ka bynta jong ngi? Ngi la ioh jingmyntoi na ka jylla ba la ioh lano?”
U la kdew ia ki jingeh jong ki nongniah kali — dor patrol ba kiew kloi, aiñ ba kylla kynsan, bad ka jingsngap jar jong ka sorkar. “Ngi dawa burom, hok bad jingsngewkhia na ka sorkar. Lada u Tirot Sing u im mynta, um ju sngap jar,” ong u Jyrwa.
U la kyntu ba ki paidbah bad ki nongialam kin pynpaw burom ïa u Tirot Sing da ka kam, da ka jingïeng lang bad ka jingsngew tynrai — ym tang da ki syntiew bad jingkren.
“Ka jingsngewkhlaiñ u Tirot Sing ka don ha man la u nongtrei uba trei hok bad u samla uba kynreh ïa ka hokduna,” la pynkut u Jyrwa.