Shillong – Ka jingpluh Iing ha Shnong Mylliem Mawpynthih myn ha ka Sngi U Blei Shiteng Synia jong ka 29 tarik u Nailur kaba dei ka Iing jong i Kong Shatilin Kharmawphlang kaba la bamduh haduh ba khlem ioh shuh ia ki kot ki sla bad ki jingdon jingem ka la pynjew mynsiem ia katei ka longiing.
Hynrei ka Iing ka sem jong i kong Shatilin Kharmawphlang ka ainguh ia U Blei ha ka jingklang jong ka ding ka la Ioh ban pynlait im ia ki khun khun kynthei bad shynrang kynthup ia i ksiew.
Ka jingpluh jong ka Iing ym tip na ka daw aiu baroh ki khun ki la thiah lut ka shnong ka thaw ka la kynjah hynrei ka shu iohsngew ka jingsma bad jingbthei kumta ka la kyrsiew pynsted ia ki khun bad kynthei bad shynrang ban khie joit ban mih bad pynlip ia ka ding.
Hynrei kaei ka khubor jong kane ka longkmie ha kane ka jingpluh Iing ka dei ka la kloi shwa ban pynlait im shwa ia ki mynsiem briew kham pher mat duh ki tiar ki khun kiba kordor wat la kylla dpei lut.
Katei ka jingjia pluh iing ka la jia ha ka shnong Mylliem Mawpynthih kaba hap ha Nongkrem Konstituensi ha ka por 12.30 AM ka 29 tarik ka sngi u Blei.
Na ka liang ka Dorbar Shnong Mylliem Mawpynthih marsien iohi ia katei ka jingjia u Secretary Shnong Mylliem Mawpynthih u Bah Halansing Kharmudai ki la leit iarap ia katei ka longiing ban leit ai jingujor ha Madanryting Police station.
Kum ka Dorbar shnong ka la pyntip mar mar sha ki bor Sorkar lyngba ka Kong Matsiewdor War IAS kaba dei ka Ophisar Executive Director Meghalaya SDMA bad u BDO ka Mylliem Block ki la leit ban ai jingiarap kyrkieh ia ka Iing ka Kong Shatilin Kharmawphlang ha kajuh hi ka Sngi da ki khaw bad ki tiar shet ia kaba pynpoi da ki heh Ophisar jong ka BLOCK ha kaba ki la kular ban pynsted ia ki jingiarap.
Ka Kong Shatilin Kharmawphlang ka dei ka riew kynthei kaba bsa hi ia ki khun hadien ba la khlad noh u kpa ki khun dang shi snem bad u khun ksiew.
Ka im bylla sngi da kaba suh ban thaiñ dhara muka jong ki briew bad ka ju shim kam na ki briew ban suh dhara bad wanrah sha Iing ban trei man ka sngi man ka miet
Mynta ka khuslai kumno kan leh shano kan ioh shuh ia kitei ki jaiñ rem dor bad ka khuslai mynsiem ban hap siew namar ki jaiñ dhara ki la ing lut.
Ka la iathuh ka jinglut baroh katkum ka kaiphot ba la ai da ki pulit ka long 13 lak tam baroh.
Ha kawei ka liang ka Dorbar shnong Mylliem Mawpynthih ka pynpaw ka jingsngewnguh ia ka Kong Matsiewdor War, ia u BDO Mylliem bad ki nongtrei kiba la kloi ban wan jurip wat hadien ba ki la pyrshang ban phone sha ki nongmihkhmat ban pyntip pynban la kloi ki bor district ban ai jingiarap
