Wat sngap ki khubor lamler pahuh ki tyndong shet Gas duna ki commercial ka Sorkar ka pynbiang ban pynpoi:Miss Saloni Verma

Shillong, March 30: Ka Director jong ka tnad Food Civil Supplies & Consumer Affairs, Solini Verma, kala kren sha ki lad pathai khubor halor ka jingpynshai ïa ki jingtip bakla (misinformation) kiba paidbah ki don halor ka LPG shnong (domestic LPG), da kaba pynpaw ba ka jylla ka dang mad ïa ka jingeh ha ka jingpynpoi bad jingpynbiang ïa ka LPG ha kine ki sngi.
Ka Verma ka la ong ba ka jingdonkam LPG ha ka jylla ka long kumba 700 haduh 750 metric tonne ha ka shi bnai, hynrei ka jingpynpoi ba la ïoh ka jylla ha kine ki sngi ka duna bha, tang kumba 300 haduh 400 metric tonne, kaba la ktah jur ïa ka jingai LPG sha ki nongpyndonkam.
Ka la ong ruh ba ka sorkar jylla ka dang ïatreilang bad ki kompani Oil Marketing Companies (OMCs) ban pyrshang pynbiang ïa ka jingdawa, da kaba buh jingkongsan ïa ki bynta kum ki hospital, ki skul bad kiwei ki jaka paidbah kiba donkam kyrkieh.
Halor ka jingkynnoh ba don ki nongdie kiba shim dor palat ïa ka LPG, ka Verma ka la kyntu ïa ki paidbah ban ujor paidbah lyngba ki number jingïarap. Ka la pyntip ïa ka toll-free number 1967 bad WhatsApp number 9402327373, ha kaba ki nongpyndonkam ki lah ban phah jingujor lada don kino kino ki jingeh ne jingduna ha ka jingai LPG.
Ka la pynpaw ruh ba ka sorkar ka la pynkhlaiñ ïa ka rukom peitngor da kaba pynïaid ïa ki Vigilance Committee ha ki district, kiba ïatreilang bad ki Deputy Commissioner, pulit bad kiwei ki bynta ban lum jingtip bad phah sha ka sorkar pdeng.
Halor ka jingpynbeit ha ka jingai LPG, ka la ong ba mynta ki nongpyndonkam ki lah ban refill tang shisien ha ka 45 sngi, kum shi bynta ban pynïaid hok ïa ka jingpynsam paidbah ha ka jylla bad ha ka ri baroh kawei.
Ka Verma ka la pynkut da kaba ong ba kane ka jingeh ka long ka jingeh kaba ïadei bad ka ri baroh kawei, bad ka jylla ka dang pyrshang katba lah ban pynbeit ïa ka jingpynpoi LPG katkum ka jingdonkam paidbah.