Shillong, 14 Risaw: Ka Hynniewtrep Youths’ Council (HYC) ka la dawa na ka sorkar ban weng shipor ia ka jingthung kam 21 ngut ki Medical & Health Officers (M&HO) hadien ba ka la lap ia ka jingbym iahap ha ka jingpynkheiñ ia ka Reservation Policy jong ka jylla pynsngew u President ka HYC Bah Roy kupar Synrem sha ki lad pathai khubor.
Katkum ka jingthoh ka Meghalaya Medical Services Recruitment Board (MMSRB) ha ka 8 tarik Risaw, na kine ki 21 post, 4 post (19%) la ai sha ki Khasi-Jaintia, 11 post (53%) sha ki Garo, 2 post (9.5%) sha ka unreserved category bad 4 post (19%) sha ki Other ST/SC. Kane, katba ong ka HYC, ka long pyrshah ia ka Reservation Policy 1971 kaba buh ia ka jingpynkylla kumne: 40% Khasi-Jaintia, 40% Garo bad 20% Others.
U President ka HYC, Bah Roykupar Synrem, u la ong ba bun ki samla Khasi-Jaintia kiba qualified ki la shah kyntait tang namar ka roster system kaba long pyrshah ia ka policy. U la ong ruh ba ki la ai da ka memorandum ha u Commissioner bad Secretary ka Health Department, u Joram Beda, ban pyntreikam biang katkum ka policy kaba dei.
Ka HYC ka dawa ruh ba ka sorkar ka dei ban pynlong ia ka rukom thungkam kaba shai bad pynpaw paidbah ia ka jingpynkylla bad ka jingai bynta kumba ka policy ka buh, khnang ba kan long kaba hok bad ka dei ia baroh ki jaidbynriew.