Shillong, 05 Naitung – Ki Nonghikai skul adhoc hapoh ka shatri jong ka Federation of All School Teachers of Meghalaya (FASTOM) wat la kim pat hun satia ia ka rai jong ka sorkar ban kyntiew tulop mar T.9 hajar ia ki nonghikai Secondary, Higher Secondary bad Science bad kumjuh ruh mar T.6 hajar ia ki nonghikai LP, hynrei ki la rai ban sangeh noh ia ka jingiakhih thiah surok bad sahmiet hakhmat secretariat.
Haba kren ha ki nongthoh khubor mynta ka sngi Babu Mayborn Lyngdoh, u la ong ba ha ka jingialang mynta ka sngi ki nonghikai ki la ban jur ba ka sorkar ka dei ban pynkiew ia ka tulop da T.18 hajar ha ka shi bnai nalor ban kyntiew beit man la u snem 5 percent na ka jingioh tulop.
Shuh shuh u Babu Mayborm uba dei ruh u ongaiktien jong ka FASTOMu la iathuh ba, ka kynhun ka la rai ban sangeh noh shuwa ia kane ka jingiakhih, hynrei yn dang bteng ban leit tied ia ka jingkhang ka sorkar halor kiwei pat ki mat jingdawa.
“Wat lada ngi la weng ia ka jingiakhih, hynrei ngi don ka jingkyrmen ba ka sorkar kan khot iakren ia ki nongialam halor ka jingdawa ban kyntiew 5 percent man la u snem” la ong shuh shuh U Babu Mayborn da kaba bynrap ruh ba dei ban pynkiew sa mar T.2 hajar ia ki nonghikai LP khnang ba ka tulop jong ki kan kot sha ka T.20 hajar shi bnai.
Shuh shuh u Babu Mayborn u la iathuh ba wat la ki nonghikai kim pat hun, hynrei ia mynta hi kin pdiang shwa ia kaei kaba ki ioh bad ka jingiakhun kam pat kut satia tad haduh ban da ioh ia ki jingmyntoi kum ki nongtrei sorkar.