Shillong: Katkum ka khubor ba la ioh lum mynta ka sngi la iathuh ba ka kong Amapreen Lyngdoh Myntri ka sorkar jylla ka lah ban iakhun MP na ka party NPP.
Ki khubor ki iathuh ba ka kyrteng jong ka kong Ampareen ka la paw hadien ka jingkyrpad jong u Nongialam ka party ha ka Ri, U Conrad Sangma kumjuh ruh u bah Prestone Tynsong nongialam ka party ha ka jylla.
Lah ban kdew hangne ba kham mynshuwa ka la don ka jingthmu jong ka party NPP ban pyniakhun da u MLA barim ka Mawsynram Constituency u bah HM Shangpliang uba la iehnoh ia ka party BJP bad rung noh sha ka NPP.
Nalor kane ka la don ruh ka jingiakren ban khot ia u Bah George B Lyngdoh nongialam ka TMC ba un wanrung sha ka party NPP bad ban pyniakhun MP.
Nalor kane na ka liang jong ka kynhun ki Dhar kiba dei ruh ki dkhot ba kham donbor hapoh ka party NPP ki la pynpaw ba ki kwah ban pyniakhun MP ia u bah Dasakhiatbha Lamare uba dei u MLA barim.
Kumta lyngba kane ka khubor kaba thymmai lada ka party ka phah iakhun ia ka kong Ampareen kiwei kiwei kin hap ban mynjur.
