Shillong Jymmang 19 – U Myntri Rangbah ka Jylla Meghalaya u Conrad K. Sangma ha ka sngi Nyngkong u la leit ban jngoh ïa ka Shillong Government College of Engineering, kaba la ïoh ïa ka jingmynjur na ka All India Council for Technical Education (AICTE) ban sdang noh ïa ki jingpule undergraduate ha ka kam shna ïing bad electrical engineering na ka bynta u snem pule 2025-2026.
Ha ryngkat ka jingsynran lang jong ki heh na ka tnad pule puthi bad ka Shillong Polytechnic College, u Myntri Rangbah ka jylla u la jurip ia ka iing jong ka Engineering College bad pynlong ia ka jingiasyllok bad ki nonghikai jong ka kolej ban sngewthuh ia ki jingdonkam jong ka kolej.
U la pynthikna ba yn pynbeit ïa baroh ki jingeh ban kyntiew ïa ki jingtei na ka bynta ban pynlong ïa ka Shillong Government College of Engineering kaba treikam kumba la bthah da ka AICTE. Ki Faculty jong ka Shillong Polytechnic College ki la pyntip ruh sha u Myntri Rangbah ka Jylla halor ka jingbei tyngka na ka bynta ki jingwad bniah ha ka liang ka Science bad Technology, ha kaba u Myntri Rangbah ka Jylla u la mynjur.
U la ong ba mynta ka Chief Minister’s Research Fellowship (CMRF) ka bei pisa ia ki jingwad bniah kiba iadei bad ki kam shna dur bad ka kolshor, ha kaba yn sa pynheh shuh shuh ban pyndap ia ki jingwad bniah ha ka liang ka Science bad Technology.
Ka Shillong Government College of Engineering ka dei ka kolej sorkar kaba nyngkong eh ha ka jylla. Ia kane ka Shithi Mynjur (LoA) la ai sha u Principal Secretary ka tnad Pule Puthi ha ka 30 tarik Risaw bad kane ka Institute ka don ha Mawlai Kynton Massar kaba don ha East Khasi Hills district bad ka dei kaba la pyniasoh bad ka North Eastern Hill University (NEHU).
Ki ar tylli ki prokram pule ba dang rit —Ka Jingshna bad ka Sivil Elektrik kin sdang da kaba shim nyngkong 30 ngut ki samla pule kawei pa kawei na ka bynta u snem pule 2025-26.