Shillong, 10 Nailur 2025 – U Myntri Rangbah ka jylla, u Conrad K. Sangma, u la leit jngoh ïa ka Lady Kerr Welfare Centre ha Laban ryngkat bad u MLA ka South Shillong, Bah Shanbor Shullai. Kane ka Centre kaba la seng naduh 1920 bad ba don ruh ka Red Cross Maternity Home ka la kylla long kaba tlot bha ha ka jingtei.
Ka Indian Red Cross Society, Meghalaya State Branch ka la kyrpad ïa ka sorkar ban iarap pynbha bad pynkhlaiñ ïa ka jaka kaba la ai jingsumar sha ki paidbah khamtam ki longïing kiba duk.
U Myntri Rangbah u la kular ban ai jingkyrshan bad ban wad lad jingïatreilang hapdeng ka sorkar bad ka Red Cross ban pynlong ïa ka Lady Kerr Welfare Centre kum ka rynsan sumar paidbah kaba khraw.