Shillong, 20 Nailar 2025 – U Myntri ka tnad Social Welfare bad Tourism u Myntri ka tnat Art & Culture, u Bah Paul Lyngdoh, u la pynpaw ka jingsngewnguh bad jingiaroh ïa ka tnat Pulit ka jylla halor ka jingjop jong ka ban kem ïa kiba donkti ha ka jingkhaii drok (Narcotic drugs), khamtam ha ka jingjia kaba dang shu jia ha East Jaintia Hills.
U Bah Lyngdoh u la ong ba ka sorkar ka la nang pynkhlaiñ ïa ki rukom treikam pyrshah ïa ka jingkhaii drok da kaba pynshisha ba kiba shah kem kin ym lait, hynrei kin hap ban shah set ïa ka jingim shisnem ha along katkum ka aiñ NDPS (Narcotic Drugs and Psychotropic Substances Act). Shuh shuh, u la pynpaw ba ka sorkar kan knieh noh ïa ki jingdon jingem jong ki nongkhaii drok, kynthup ïa ki bank account, ki jaka, ki kali bad ki jingdon jingem ba ki la dep seng na ka bai khaii drok.
U la ong ruh ba lyngba kine ki jingpynrem bad jingknieh jingdon jingem, ka sorkar ka la ïoh ban lum da ki klur tyngka ban wanrah sha ka khyrdop treikam, kaba pyni ba ka jingïakhun pyrshah ïa u drok kam dei tang da kaba set briew hynrei ka long ruh da kaba pynduh syndon ïa ki lad ai jingmyntoi jong ki nongkhaii drok.
“Ka jingjop jong ki pulit jong ka East Jaintia Hills ha ka jingkem ïa ki nongkhaii drok ka dei ka nuksa ba khraw ba ïa ka jingïakhun pyrshah ïa u drok dei ban shim kum ka jingïakhun imlang sahlang. Nga ai ka jingïaroh kyrpang ïa ka tnat Pulit kaba la trei borbah ban tehlakam ïa kane ka jingeh kaba wanrah jingsniew ha ki samla,” la ong u Bah Paul Lyngdoh.