Shillong, 7 Nailar 2025 — Ka jingialang jong ka kynhun Sur U Paidbah na South West Khasi Hills ryngkat ka jingïakynduh lang bad u Myntri Rangbah ka jylla, Conrad K. Sangma, ka la pynlong ïa u ban pynbna paidbah ïa ka rai ba ka sorkar ka la shimkhia ban shna noh ïa ka surok na Weiloi sha Keniong lyngba Mawkyrwat, kaba dei ka surok ba don ka jingdonkam kaba khraw na ka bynta u paidbah ka thain.
U Conrad K. Sangma haba kren sha ki lad pathai khubor u la ong: “Ngan ym lah ban kdew beit ïa ka jingjrong (distance) kaba biang, hynrei katkum ka DPR kaba la dep shna, ka jingkhein estimate kaba sdang ka long kumba T.200 klur. Kane ka surok la pynrung hapoh ka phase kaba ar jong ka World Bank Project, kaba dei ruh ka bynta jong ka skhim mega T. 2500 klur.”
U la pynpaw ruh ïa ka jingkmen halor kane ka rai:
“Nga la leit da ki sien sha katei ka jaka, bad nga ju angnud ban shna noh ïa kane ka surok. Te haba la ai ka pisa na World Bank, nga la bthah ïa ka team ba kane ka surok ka dei ban don ha ka list. Ym tang kane ka surok, hynrei ka surok sha Vellot Syrnam ruh la pynrung.”
U Myntri Rangbah u la ong ruh ba:
“Ngi la dep ïa ka DPR, bad ngi khmih lynti ba ka jingïoh tender bad kiwei pat ki jingpynkhreh kin dep haduh quarter ba khatduh jong kane ka mang tyngka — kum ha u Kyllalyngkot ne Rymphang. Nga khmih lynti ba ha u Lber 2026, ngi lah ban peit ïa ka jingïoh sdang ban tei ïa kane ka surok.
Ha kajuh ka por, u Conrad Sangma u la pynpaw ba u la dep ujor sha ka Sorkar Pdeng halor ka jingdonkam ban thaw ka economic corridor kaba kdup ïa ka thaiñ khappud ka jylla, kaba kynthup ïa ki surok ba don bynta bad ka NH-127 (National Highway 127) bad ki jaka jong ka West Khasi Hills bad South West Khasi Hills.
“Nga la kren bad ka Prime Minister bad ki Myntri ka tnat pisa (Finance Ministry) halor kane. Ka jubab kaba wan ruh ka long kaba kmen, hynrei ym pat lah ban pynbna paidbah kumba la pdiang lut,” la ong u Conrad.