Shillong – Ka kynhun Kabinet ba la ialam da ka Sorkar Meghalaya Democratic Alliance (MDA) myn ka 9 tarik u Naiwieng 2022 ka la mynjur ban shna ia ka Meghalaya State Education Commission, ban peit bishar bniah bha lem ka jingaimut ia ka Sorkar ban wanrah noh ia ki jingpynkylla ha ka pule puthi hapoh ka Jylla iathuh u Çonrad K Sangma Myntri Rangbah ka Jylla hadien ka jingialang ka kynhun myntri. U Myntri Rangbah u la iathuh ka kynhun myntri ka mynjur ha ka jingshim rai lang ia kaba la pyntip ba ka Commission kan don haduh 4 ngut ki Dkhot ba kynthup ia uwei u Chairperson, arngut ki Nongai buit bad uwei u Secretary. Ka Commission ka long ban ai jingmut ia ka Sorkar Meghalaya halor ki kam ba iadei bad ki skul bad College katei ka dei ka jingtrei Kam, pyntip u Çonrad K Sangma Haba phai sha ka rukom treikam jong ki, ka rukom pyniaid ia ka pule ka dangle, ka jingsiew tulop, ka rukom pyniaid ia ki jaka pule bad ban aijingmut ia ki lad ki lynti bad ki buit ban wanrah jingkylla ia ka pule ka dangle kat kum ka National Education Policy (NEP) 2020. Ka Commission kan khmih ia ka jingwanrah ia ki lad ki lynti ban pynthikna ia ka jingsiew tulop ka bym don jingiapher than hapdeng ki Nonghikai ba iarap da ka Sorkar bad ki Nonghikai Sorkar. Kan khmih ruh ia ki lynti jam ba shakhmat haba phai sha ki nonghikai SSA, ban pynshong nongrim ia ki skul khamtam ia ki skul ba duna khynnah, bym don khynnah, bad ba duna nonghikai. Kumjuh ruh kan khmih halor ka jingeh ba iadei bad ka jingioh ia ki nonghikai ia ki Ktien bapher bapher khamtam ha ki jaka khappud. U Myntri Rangbah ka Jylla Conrad K Sangma ula pyntip ba ka Sorkar Jylla kala trei borbah bha ha kine ki saw snem tam ha ka kam pule dangle bad mynta kala sdang ban paw ka dak ba kala kham janai. Ula ong ba hapoh ka PGI score, ka NITI Aayog kala ithuh ba haba phai sha ki jingtei bad ki jingdonkam baroh jong ki jaka pule, ka Meghalaya kala wan ha ka kyrdan ba-ar ha ka Ri haba phai sha ka jinglah pynjanai ia ka pule ka dangle.
