Shillong. – Ka jingpluh iing kaba la jia ha ka sngi Saitjain, kala shimpor palat 24 kynta ban tehlakam ia ka ding wat lada la iarap lang da ki bor shipai bad Air force kumta na ka Liang ka Sorkar Jylla lyngba u Conrad K Sangma u la bthah ia ki heh sorkar ban pynlong ia ka jingtohkit.
U Conrad K. Sangma Myntri Rangbah ka Jylla haba leit JURIP ia ka jingpluh ka iing ki Singkhania ha Thana Road, Police Bazar u la bthah ban leh ia ka Fire Safety Audit hapoh ka Jylla.
Ia ka jingleit jurip pluh ding jong u Myntri Rangbah bad ba la shong jingialang ban bishar kam bad ki heh Ophisar la synran da u Chief Secretary ka Jylla Bah DP Wahlang bad u DGP Dr LR Bishnoi lem bad kiwei kiwei ki Heh Ophisar.
U Conrad K Sangma haba iakren sha ki lad pathai khubor ula bthah ia ki Heh Ophisar ba kin aiti kloi ia ka kaiphod halor kane ka jingjia, kaba la shim ia kawei ka mynsiem briew.
Shuh shuh u Myntri Rangbah u la ai hukum iaki Ophisar ba kin pynlong ia ka safety audit jong kane ka Iing bad ban pynthikna ia ki daw jong kane ka jingpluh.
U la ai khublei ia baroh ki Tnad ba dei khmih bad ki Ophisar khamtam ki Pulit pynlip ding, ki shipai, Air Force, Assam Rifles, BSF, ki bor District bad ki paidbah kila iamih ryntih ban tem ia kane ka jinglong jingman. Namar kane ka jingjia ka dei kaba buh jingma bha namar ka iing ka dei kaba don hapdeng ka jaka iew, kaba khapngiah bad kaba buh ha ka jingeh ia ki kali pynlip ding ba kin wan. Ka dei kaba shitom bha, iathuh u Conrad K Sangma.
U Myntri Rangbah u la batai ba pluh ding ka dei kaba bun ki godown, kaba pynlong ia ki kynhun ai jingiarap ban shem jingeh bha ha kaban tem ia ka ding.
Ha kawei ka Liang ka Sorkar kan wad ia ka lynti ban leh ia ka Fire Stafety Audit ban pynthikna ban iada kine ki jingjia kin nym mih shuh hadien habud bad ka sorkar kan sa shim ia ka rai ban iakren ha ka kynhun Myntri ka ban sa long ha ka 18 tarik u Risaw