Shillong, Nohprah 18: Kham ñiar napdeng ki riew saiñ pyrthei kiba la ih ban don ha la ka jong ka nongrim lada ym don kiba dang burom ia ki bad ki bym kwah nam pyrthei tang ban neh ka Lariti jong ka seng naduh ba la seng. U Bah Bindo M Lanong MDC bala shu sieh u la long u langkñia ban shah kynteiñ ha ki nongialam ka seng United Democratic Party ha ka jingialam u Bah Metbah Lyngdoh President bad u bah Jemino Mawthoh Secretary. U Bah Bindo Mathew Lanong uwei na ki riew saiñ pyrthei ba la ih bha ha ka kam saiñ hima u la shah ieh marwei bad kyntait da ka seng United Democratic Party bad ym don ba kheiñ briew shuh ia u haba ioh iakren sha ki lad pathai khubor ha Shillong. U bah Bindo u la iathuh ba un leit jingkyrshan noh ia ka kynhun jong u Bah Pyniaid Sing Syiem CEM ba la lam khmat ia ka EC ha KHADC bad un sa leit iarap lang ruh ban ialap elekshon MP ia ka seng NPP ha ka samoi 2023. Utei u Riew saiñ pyrthei ba la ih bha u la pyntip ba ai da ka jignthoh sha u CEM jong ka KHADC u bah Pyniaid Sing Syiem ban ai ia ka jingkyrshan ia kane ka EC jong ka NPP ha ka 19 tarik u Nohprah. Ban bynrap ia ka kyrteng ban long MDC ba shu sieh dei u Dr. Donkupar Roy bam kwai ha dwar u blei bad ba pynneh ia u ha kane ka shuki MDC kam dei ka UDP Hadien ba la phah sha u Lat ka jylla ban thung kum u MDC ha KHADC. U la ong ba naduh u snem 1972 haduh mymta u khlem kylla jutang ia ka nongrim kaba u don, ka jingkylla dei tang ka kyrteng jong ki party, ha u snem 1972 ka don ka APHLC, hadien ka mih ka HPU bad mynta UDP, ka mynsiem ka don bad ki seng riewlum hynrei mynta u la laitluid un ai ka jingkyrshan ia ka EC jong ka NPP ha KHADC. Ka jingleh lyndet jong ka UDP ia u ka long ba ha ka elekshon MLA kaba ladep u la ia khun na NOngkrem kum u kyrtong shimet ka daw ka long ba ka party ka ai tiket ia u briew bym dei jong ka party, ka party UDP kala kyntait ban ai tiket ia u briew jong ka party dei na kane ka daw ba u hap ban ia khun.Mar ia dep ka elekhson u la thoh sha ka party ban ia klet noh ia kaei kaba la jia bad u la thoh ia ka shithi ban pan tiket MP hynrei ka pary kam shym la jubab haduh ba un da tohhi da lade ba un la weng noh ia kane ka jingpan tiket.La ong ba wat ha ka General Council Meeting ruh ka party UDP ka khlem pyntip shuh sha u bad u khlem leit hi, ruh la kynthoh ba ka jingtlop ki seng riewlum dei ka jingbym burom ia ki nongialam barim jong ka party.