Shillong:Ka DHS barim ka jylla ka Dr. Rita Tariang kala pyniasoh noh ialade bad ka seng BJP Meghalaya bad la pdiang sngewbha ia ka da ki nongialam jong ka seng.
U President ka BJP Meghalaya u Rickman G. Momin, ryngjat bad ki Vice President u Bah Khrawboklang Basaiawmoit, Gagan Jain bad u Wankitbok Pohshna, u General Secretary Bah Everist Myrsing bad ka secretary Kong Dr. Bernadette Lyngdoh kila pdiang sngewbha ia ka Dr Rita Tariang.
U Rickman Momin ula ong ba ka “Dr. Tariang kadei kaba la don ia bun ki jingnang jingtip ha kaban pyniaid ia ki kam ki jam bad ka jingtrei shitom ka jong ka ban pyniar ia ka jingai jingsumar na ka bynta kito kiba donkam ia ka jingsumar kadei kaei kaei kaba ka seng kala tipshai bha”.
“Ka seng kan ioh jingmyntoi bha na ka jingshemphang jong ka Dr Rita bad khamtam ia ka jingtip kaba bniah ka jongka kaban iarap ia ka seng ha kaban ai jingshakri ia ki paidbah ka Meghalaya”.ula ong.
Ka Dr Rita kala ong ba ka daw kaba pynlong ia ka ban pyniasoh bad ka BJP kadei haba kala iohi ba kadei tang kane ka seng kaba trei man la ka por ban kyntiew ia u duk u suk bad kiba kyrduh bad ka nuksa kaba la pyni kadei lyngba ka jingpyntrei ia kiba bun ki skhim kiba iadei bad ka koit ka khiah kiba la wanrah da ka sorkar pdeng hapoh ka jingialam u Narendra Modi.
