Shillong – Ka Parish Epiphany Mawbri Ri Bhoi ka la pynlong ia ka Sngi burom Parish ha ka Balang Shnong Mawkyrdep myn ha ka 7 tarik u Kyllalyngkot 2024 da ka Proseshon Iukharist kaba shisien shisnem Ia katei ka sngi burom jong ka Parish Mawbri kaba dei ka Sngi Kynmaw kyrpang ia ka jingpynpaw u Khunlung Jisu ha ki nongap langbrot na ka liang ka Balang Balang Shnong Mawkyrdep ka la pdiang sngewbha ia proseshon Iukharist ia kaba la long da ka Mass Bakhuid bad ka jingiaid riewblei ban Mane ia u Khrist ia ka la pynlong ha Madan Phutbol Mawkyrdep. Da ki spah Ngut ki paid u Blei nabaroh ka Parish ki la wan shim bynta ha ka Nguh ka Dem Blei ba la pynmynta da u Sohblei Bernard Laloo uba dei u Chancellor ka Shillong Archdiocese ia kaba la phah da u Archbishop Victor Lyngdoh. Ha kaba sdang ia ka Mass Bakhuid u Parish Priest u Sohblei Balenstine Marbaniang u la pdiang sngewbha ia ki paid u Blei bad pynbna ba ka Parish Mawbri ka ju rakhe parish man la u snem ha u Taïew nyngkong jong u Kyllalyngkot, shuh shuh ka proseshon bad Iukharist ba la pynlong mynta u snem la don da ki spah ngut ki samla kiba la ioh pdiang ia ka Sakrament Jingpynskhem na u Chancellor lyngba ka jingai bor da u Archbishop. Ha ka Mass Bakhuid ka Parish council bad u Parish Priest ki la ai ia ka Komunion Bakhuid sha ki heprit kiba dang ioh pdiang nyngkong ia ka Met ka Snam u Khrist ha ka jingim jong ki. Ha ka por Nohphai la sdang ia ka jingiaid riewblei ia ka Proseshon Iukharist ia kaba la iaid tawiar ia ka shnong baroh kawei ryngkat ka Kali kaba kit ia ka Sakrament Iukharist ba la rah da u Sohblei Bernard Laloo Chancellor bad uba la pynkut da ka jingkyrkhu Sakrament.
