Shillong – U MP ka Shillong Seat bad President ka Meghalaya Pradesh Congress Committee (MPCC) Bah Vincent H Pala, u la sngewkhia ia ka khubor ba ka Seng Hynniewtrep National Liberation Council (HNLC) ka la dep pynsangeh ne pynkut noh ia ka jingiakren iasuk. Utei u MP u kyrpad ia katei ka Seng ka dei ban pyrkhat arsien ba kam dei shim rai ban sangeh ban kren iasuk bad ka sorkar haba pynsngew sha ki lad pathai khubor hadien ka jingialang jong ka Seng Congress kaba la long ha Congress Bhavan myn ha ka 9 tarik u Kylla Lyngkot. Dei ban long kiba iaishah namar ka rai ba ka shim ka lah ban don shibun ki jingktah. Lada ki la kloi ba. shim rai ka lah ban ktah ia ka ioh ka kot ka Jylla, ka jingim ki briew bad shibun kiei kiei hapoh ka Jylla iathuh u Bah Vincent H Pala ia ka Seng HNLC. U la pynsngew sha ka seng HNLC ka jingiadei bad ka Sorkar Jylla ne Sorkar India ka long kaba donkam khamtam ka Sorkar MDA 2 ka dei ban shim khia bha. U Bah Pala u kubur namar bym shimkhia ka sorkar ka kdew ia ka HNLC ia ki mat jingdawa ka seng kum ka daw ba ka rai ban pynsangeh noh ia kane ka jingiakren iasuk. Kawei na kine ki mat ka dei ban map noh ia ki kam bymman bala pynngat ia ki Nongialam bad ki dkhot. Ia kata ka shong ha ka jingstad jong ka sorkar. Lah ban kdew ba ka HNLC kala pynkut noh ia ka jingiakren iasuk ha ka 8 tarik Kyllalyngkot, 2024 da ka jingaiti ia ka shithi ba pynbna ia kane ka rai sha ka Sorkar Jylla.
