Tura, 18 Kyllalyngkot 2024 – ka jingai mynsiem bad ka jingkmen ka la mih paw ha ka Meghalaya Games ha kaba I kong Marbarisha M Pdah, 44 snem ka rta, I hap ban pynbit pynbiang ialade ban iakhun ha ka jinglehkai syndah lang bad I khun kynthei jong I, I Toiaibha M Pdah ba dang 24 snem ka rta bad kine arngut kin iakhun lang ha ka Senior Women’s Category ha ka 10 m bad 50 m Rifle event bad kawei pat kan dei ha ka 10 m & 25 m Pistol event. Ka jingiaid lynti jong kine arngut ka pyni shai ia ka jingkhlaiñ ka iing ka sem ban iaid ryngkat lang ban pynurlong ia ka jingphohsniew ka jong ki.Kane baroh ka la wan long hadien bad I kong Marbarisha I sngew ioh mynsiem na ka jinsngewtynnad ka khun ban siat pistol bad katba dang iaid ki por, I ju ialam I ka khun ban shah hikai ha ka siat pistol bad ai mynsiem ia ka khun. Haba iohi ba ka khun ka kiew ha ka kam lehkai ha ki jingiakhun bapher bapher, I kong Marbarisha I la sdang ban iaid thymmai ka jingim jong I ban mih shakhmat ha ki kam lehkai.”haba nga iohi ia ka Toiaibha ba ka ieng ha ka nongrim lade ban poi sha ka thong, kane ka pynskuiñ ia ka mynsiem jong nga, bad nga sngewthuh ba kam pat dier ka por ban beh ia ka thong bad ban bud ia ka jingphohsniew,” ong I kong Marbarisha, haba kren shuwa ban iakhun ha ka 5th Meghalaya Games. “Ka Meghalaya Games ka ai ia ngi ia ka kabu ban mih madan lang bad ban wanrah burom ia k jylla.”Haba kren khyndiat bad I samla Toiaibha, I la ong, “Kum I khynnah skul, nga ju don bynta kum ka NCC cadets, bad dei nangne ba nga sdang ban sngewtynnad ban siat suloi. I mei I ju ai mynsiem ia nga ban leit sh ki NCC camps bad I ju ai mynsiem ruh ba ngan iaid beit shakhmat ha ki jinglehkai siat suloi. Ha u snem 2016, nga ioh ia ka call na I paralok bad I la wer ia nga ban rung dkhot ha ka Shooting Association. Kadei ka jingkwah I mei ba ngan long ka nonglehkai. I ju synran ia nga da leit lehkai ha Assam Rifles kaba don ha Happy Valley, Shillong. Ha kaba nyngkong, I ju sngew artatien ban rung lang ban lehkai namar ka rta, hynrei I ju synrn ia nga sha ki State/National Championship.”
