Shillong, Rymphang 25: Ka Balang Lawsohtun ka Iing Mane Divine Savior Church, ka la kmen ban ia ka Iing Sad Iing Sunon ia kaba la tei hi da ka Balang Shnong khlem ka jingkyrshan na ka Shnat Niam St. John,’s Laban ka la lah hi ban bei ban shna da ka bor pisa na u Syniang ba la lum da ki bun snem.
Ka CBC Lawsohtun ka hap ha ka Shnat Niam Laban ka la Pynpaw ka jingkmen wat hapdeng ka jingpynthud ki bor mariang lah ban kyrkhu bad plie ia ka Iing Mane Divine Saviour myn ha ka 25 tarik u Rymphang da u Lyngdoh Sad Ràngbah Jylla Niam Bah Shillong u Most, Rev. Archbishop Victor Lyngdoh
Haba sdang ban kyrkhu ia ka Iing Mane Thymmai u Archbishop Victor Lyngdoh u la long u Nongkñia Rangbah ka jingïadon lang u Lyngdoh Nongsharai jong ka Parish, Sohblei Cresence Khongwir, U Lyngdoh Synrop bad kiwei kiwei ki Lyngdoh ban ïarap ban tyrwa ha ka kñia ka khriam.
U Archbishop Victor Lyngdoh u la kyrpad kyrpon na u Blei ban pan bor na U Mynsiem Bakhuid ba kane ka Iing Blei ba plie kan long ka Bor jong u Blei ban khot ban lum ia ki Mynsiem kiba thrang bathngan ia u Blei ban mane.
Ha ka duwai phirat bad pynkyntang ia ka Iing Bakhuid ha ryngkat ka Umkhuid Umsynlar ban synreit ia ki kyndong kynshrot jong ki Saw kynroh ka Iing Mane ban lait na kaei kaei ka jingma kaba ap ia u paid u Blei uba rung uba Duwai ia u Blei.
Hadien ka jingsynreit umkyrkhu ia ka Iing Mane bad duwai ia ka Duwan Dupat u Lyngdoh Sad u la risa bad rwai ia ka Burom jong U Blei ia kaba la rwai da ka Kwaiar.
Hapdeng u slap bad ka lyer da hajar ngut ki paid riewngeit jong kane ka Balang Shnong, ha ryngkat kiwei pat ki para ba ngeit jong ka Parish Laban; ki nongïalam sorkar bapher bapher kiba kynthup ïa u MLA ka thain Bah Ronnie V Lyngdoh, u MDC Bah Michelle Wankhar, ka Myntri Sorkar Kong Ampareen Lyngdoh bad kiwei de ki nongshahkhot sngewbha.
Ka Balang Shnong ka iathuh jong ki riew rangbah kane ka balang shnong, la ong ba la buh ïa u mawnongrim ban tei ïa ka ïingmane naduh ka snem 2007 bad ha ki jingtrei barit jong ki parabangeit ha la i jingnoh synñiang barit, ka kam ka la ïaid suki suki.
Dei pat haduh ka jingwan jong u Fr Cresence Khongwir, u Parish Priest ha ka snem 2015 ba u sa shimti ban pynurlong ïa kane ka jingtrei ba la bet symbai da kiba ha shuwa bad da ka jingtrei baradbah bad ka jingaiti ba pura, kane ka jingangnud ka la ïaid stet bad la lah ban pynïeng ïa kane ka ïing khuid ïing kyntang ha kaba la ïoh ban kyrkhu ïa ka ha kane ka sngi.
