Nongpoh: 21 Lber: Ki pulit ki la bat ia 2 ngut ki briew ha ka sngi palei na ka bynta ban pynlong ia ka jingtohkit halor ka jinglap dien ba ki la don ka jingiasyllok bad ka HNLC na ka bynta ban pynrung dkhot bad kumjuh ruh ban pynlong ia ki kam dawa pisa.
U SP jong Ri Bhoi, U Jagpal Singh Dhanoa u la iathuh ba la bat ia kitei ki 2 ngut ki samla ki bym pat kwah ban pynpaw kyrteng khamtam lada don kiba la siew pisa ha kan ka seng kiengatiar da kaba ong ruh ba lada lap iano iano kiba siew pisa sha kane ka kynhun seng kiengatiar yn pynngat ia ki ha ki kyndon kam be-ain.
U SP u la kyntu ia ki riew paidbah ba lada ki ioh ia kino kino jingshah phone ha ka HNLC da kaba shah dawa pisa lane kiwei pat ki kam dei ban pyntip sha ki pulit bad dei ruh ban block ia uta u number ba ki ioh phone.
U SP u la pyllait ruh ia kawei ka video ba la iakren hapdeng u Commander ka HNLC u Sanbor Pala bad uwei uba la shah kem halor ka jingbthei bom ha Ri Bhoi.
Ki pulit ki la register mukotduma ruh halor ka jingpynher ia ka lama jong ka HNLC ha surok bah ha u bnai august jong u snem 2023.
