Ka Burom ia ki Longkmie Khasi na ka bynta i Kong Idashisha Nongrang ba ioh DGP: Kong Silbi Passah.

Shillong – Ka Kong Silbi Passah kawei na ki nongioh khusnam Padma Shri na ka kti ka President jong ka India ka Droupadi Murmu ka la mih shakhmat ban ai khublei ia Kong Idashisha Nongrang IPS kaba la ioh ban long kum ka khliehduh jong ki pulit ka jylla Director General of Police kaba la shimti myn ha ka 20 tarik u Jymmang 2024.
Ka Kong Silbi Passah ha ka kyrwoh jong i ia ka Kong I.Nongrang i dap da ka jingsarong ba Longkmie Khasi kaba nyngkong ban poi sha ka kyrdan ha khliehduh ki pulit ka jylla ia kaba ka kynthei ka Bri u Hynniew ka la ioh ban shong shuki ban peit ia ka suk ka saiñ jong ka jylla.
I Kong Silbi Passah shuh shuh ha ka kyrwoh ba phah sha i Kong Nongrang lyngba u lad pathai I ong “To U Blei Trai Kynrad Un donlang un kyrkhu ia i Kong Idashisha Nongrang ha ki jingtrei shakri ia ka kam, U Blei un ai ia i Kong Nongrang ia ka koit ka khiah ha ka Bor Pyrkhat kaba khlaiñ, ka jingshemphang ba in lah ban pyndep hok ia la ki kamram ha ka kam kaba I trei.
To u Blei Un Don ryngkat bad phi bad ka Iing ka sem jong i.