Ia kane ka rai la shim haka jingialang jong ka EC haka jingdon lang u Syiem ka Hima Mylliem bad ki nongialam ka Hynniewtrep Iewduh Association.
Haba kren sha ki lad pathai khubor u Chief Executive Member (CEM) ka KHADC Bah Pyniaid Sing Syiem ula iathuh ba ka EC kala rai ba ki dukan ha Iewduh ki dei ban khang noh hapoh ka 10 baje man ka miet.
Ula ong ba ka EC kala shim ia kane ka rai naka bynta ban tehlakam iaki kam sniew kiba lah ban jyllei hapoh Iewduh naduh, ka kam khalai, ka jingjyllei u Droks bad kiwei kiwei de.
“Naka liang ka EC kan sa pynmih daka hukum shaka Hima Mylliem ban pynthikna ba kan treikam kane ka rai ” ula ong.
“Ka EC kala rai ban phah ia 10 ngut ki Pulit Enforcement jong ka KHADC ban iarap iaki 10 ngut ki Pulit ka Hima Mylliem ban pahara man ka miet ia ka Iewduh khnang ban tehlakam ia ki nongtuh” ula bynrap.
U Bah Pyniaid ula kubur ba ki don katto katne tylli ki dukan kiba buh briew ban sah miet ha ki dukan jong ki khnang ba kin peitngor iaki dukan, ioh ki shah tuh.
“Ia ki briew kiba la ioh jingbit ban sah miet, ka EC kala rai ban ai por iaki ban mih noh ha lane shwa ka 1 tarik Jylliew 2024” ula ong.