Shillong, Jymmang 27: Ka Hynniewtrep Youth Council (HYC) kala kyntu iaka Director General of Police (DGP) ka Meghalaya ka Kong Idashisha Nongrang ban tuklar bad shimkhia bha halor ka jingjyllei drok hapoh ka Jylla.
Haba aiti daka Dorkhas sha ka Kong Nongrang hynne ka sngi Thohdieng, u President ka HYC Bah Roy Kupar Synrem ula ong baka tnat Pulit ka donkam ban pynkhlain shuh shuh ia ki bor treikam ban tehlakam iaka jingwan poi u drok shapoh ka Jylla.
“Ngi kyntu baka tnat Pulit ka dei ban shim daki sienjam ba tyngeh ban tehlakam iaka jingwan poi u drok hapoh ka Jylla. Ngi kyntu iaki Pulit ka Jylla, ki shipai iada khappud Border Security Force (BSF) ka tnat Custom & Central Excise ban pynlong ka jingtalasi barabor bad ban iatreilang naka bynta ban iakhun pyrshah ka jingjyllei drok hapoh ka Jylla bad ha ka juh ka por ban iatreilang bad ki Bor Shnong ban talasi haki jaka rung jaka mih jong ka Jylla” ong u Bah Roy.
U Bah Roy ula ong baka NDPS Act, 1985 ka don lypa ki kyndon ba tyngeh ban tehlakam ia ki nongkhaii bad nongdih drok hynrei watla bun ki case ki dei ki bym lah bah jamin la shem pat ba bun ki nongkhaii droks kila lait na along namar kiba bun ki jingbym biang.
Ki don bun ki case jong ki briew bala pynngat ha ka NDPS kiba la hap pynkut noh iaka case namar ka jingbym treikam lane ka jingbym iahap ki kyndon.
“Ka jingioh jamih ki nongleh kam beain hapoh ka NDPS ka buh jingma iaka imlang sahlang bad ka wanrah ka jingduh mynsiem iaki paidbah ban ioh bishar hok haka imlang sahlang namar kane donkam baki Investigating Agencies/Prosecutors kidei ban long kiba tip kham bniah iaki kyndon halor ka rukom tohkit ne bishar naka bynta ban ioh pyntreikam hok iaka ain” ula ong.
“Naka bynta ban poi shaka thong bad ban pyntreikam hok iaka ain bad ban bishar hok hapoh ka NDPS cases, ki Enforcement Agencies jong ka Jylla kidei ban tip lut, kumno ban iaid katkum ka Act haka por tohkit naka bynta ban iaid beit ka jingbishar”.
Haba iadei bad ki mar tuh, u president ka HYC ula ong “Ka Section 317 jong ka Bharatiya Nyaya Sanhita, 2023 (Repealing the Indian Penal Code, 1860) kan treikam naduh 1 tarik Naitung 2024 ka don ki kyndon pyrshah ia kino kino kiba thied iaki mar tuh.
U Bah Roy ula iathuh baka seng kala ioh jingtip na ki nongdih drok bad kiba haing ha sem bad ki nongdih drok kim banse ban tuh nala in gtang ban ioh pisa thied drok bad kila die tad iaki mar ba shu tuh.
“Naka bynta ban pynshai paidbah halor ka Section 317 jong ka Bharatiya Nyaya Sanhita, 2023, ka tnat kadei ban ialap paidbah khnang ba ki paidbah ki sngewthuh baka long beain ban thied iaki mar tuh, ba wan die da ki nongdihd drok” ula ong.