Naduh ba khlad noh uwei u nongtrei Lineman hapoh ka thain Umsiang, ha u snem 2010 hynrei haduh mynta ka tnat kam pat thung briew satia ban bujli ia u briew uba la khlad” iathuh u MLA ka Mawhati u Bah Charles Marngar hadien ka Jingwan kynduh ia u Myntri ka tnad Kam Pynmih Bording ka jylla myn ha ka 24 tarik u Jylliew.
U Bah Charles Marngar u iathuh ka Jylla Meghalaya kala don 52 snem hynrei ki dang don 7 tylli ki shnong hapoh ka thain Umsiang, ki bym pat ioh bording hapoh Ri-bhoi district.
Kine ki shnong ki kynthup Makdoh, Muska, Anjong, Markhangduba, Amdubighat, Amphreng, bad Nongthymmai Makdoh bad kine ki shnong ki don marjan bad ka thain Jagiroad ka Jylla Assam.
U MLA ka Mawhati ula kam baka daw bah ba pynlong iaki shnong ban duh bording kadei namar ka tnat MeECL ka duna palat ki nongtrei.
Ia kane la pyntip u MLA bad MDC ka Mawhati Constituency Bah Charles Marngar uba la wan dawa na u Myntri ka tnat Bording ka Sorkar Jylla AT Mondal ban shim ia ki sienjam ba dei ban shim ha ka ban pynpoi bording ha kine ki shnong.
Ula iathuh ba kane ka jingbym don bording ka buh jingeh bha iaki khynnah bad samla pule kiba hap ban pynkhreh iala ki eksamin. Kane kala buh jingeh ruh wat ia ki samla sengkam lajong kum ki karkhana shan jingshna, ki jaka thain jain ki mad ka jingeh namar ka jingbym don bording.
“Ki 7 tylli ki shnong haduh mynta kim pat ioh bording …wat ki shnong marjan bad ka Umsning ruh ki ioh bording tang 1-2 kynta man ka sngi bad kane ka buh jingeh bha iaki paidbah khamtam kum ha kane ka juk ba ka Bording ka long kaba donkam haduh kata naka bynta baroh ki kam” ong u Bah Charles.
U Bah Chalres ula iathuh ba ha u snem 2018-2019 kala don ka jingthmu ban pynpoi bording sha kine ki 7 tylli ki shnong lyngba ka skhim DDUJGY 1 bad ki kam ban pyndait wire bad Transformer ruh kala sdang.
“Hynrei haduh mynta, ki wire kila sarang bad kila jah lut bad u Transformer ula sinew bad ki paidbah haduh mynta ki dang sah hapdeng ka jingdum” ula ong.