Naduh u Rymphang 2022, ka sorkar India, lyngba ka Petroleum Ministry kala sdang pyntreikam ia ka jingkhleng lang 10% ka Ethanol ha ka Petrol hapoh ka ri, iathuh ka Petroleum Dealers Association, Meghalaya (PDAM) ha ka sngi Balang, lyngba u President Bah Kenedy C Khyriem haba iakren sha ki lad pathai khubor ha Shillong Press club.
U Bah Khyriem u pyntip paidbah ba kin long kiba phikir bha namar ba ka don ka jingkhleh ia ka Ethanol ha ka petrol.
Ka sorkar kala sdang ban khleh haduh 20% ka Ethanol ha ka Petrol.
Ka Ethanol ka dei kaba kjit ia ka haw haw bad kloi ban shim ia ka um kumta ka lah ban ktah kylla ia ki kali.
Na ka Liang ki Dealers Association ha ka ri baroh kawei, kila pyrshah jur ia kane ka jingthmu jong ka Sorkar namar wat lada don tang khyndiat ka um ha ki tanki kali ne hapoh jong ka tanking jong ngi kiba don shapoh khyndew, kane kan pynmih ia ka jingeh. Hynrei ka sorkar kala pynmih ia ka Petrol bad die ia kane ka petrol ba khlehlang bad ka Ethanol.
Khamtam ha ka por lyiur ka long kaba kongsan ia ki nongthied ba kin tap bha ia ki kali bad ki thuk thuk khamtam eh ia ki thuk thuk bad ban pynthikna ban tap bha ia ki jingsop jongka tanki.
U Bah Khyriem ula ong hashwa ban sdang ia ka jingkhleh lang ia ka Ethanol bad ka Petrol, ki trai jongki Petrol Pump kila pynkhuid ia ki tanki kiba don shapoh khyndew ban pynthikna ba ym dei ban don um. Nalor kane, ngi khmih man la ka sngi ia ki tanki ban ym don um.
Nalor katei, ka Meghalaya ka dei kaba mad ia ka jingjur slap bha kumta ka don ka jingma ba ka um ka lah ban rung ha ki tanki khamtam eh ha ki tanki jongki thuk thuk.