Shillong: U nongïalam ka Liang Ïatei ha KHADC u Bah T W Chyne uba dei ruh u MDC ka Sohra Konstitwensi ha ka Sngi kut noh jong ka Ïingdorbar Lyuir ka KHADC ha ka Sngi Thohdieng u wanrah ia ka kynta jingkylli ha kaba iadei bad ka pisa kaba la thied ne pynlut ha ki kot ki sla (stationary)
U Bah Titus Chyne haba buh jingkylli ia u Bah Pyniaid Sing Syiem CEM la ïathuh ba ka pisa kaba la thied ne pynlut ha ki kot ki sla (stationary) ka long T. 19, 20, 512 lak katba ïa ki tiar computer lane computer peripherals ka long T. 20,21,950 lak kaba dei na ka bynta u snem 2023-2024.
Haba ïohsngew ïa kane ka jubab u nongïalam ka Liang Ïatei u Bah T W Chyne u la kyntu ïa ka EM ba kadei ban leh da kaba tyngeh ïa ki nongtrei ne ki ophisar ki bym kheiñ snep ïa ka EM.
U Bah Chyne, u la kylli la ka jingthied ïa ki kot sada ne kiwei ki kot ki sla, ka don ne em ka rukom pynïaid kam ka da dei ban khot tender bad kiwei ki jingdonkam haba ïadei bad ki supplier.
Halor kane u CEM u la ïathuh ba halor ki kot ki sla, ka don ka rukom treikam kaba dei haba la khot ïa ki firm ban iaid katkum ki kyndon bad halor ka jingkylli ïa ka tnat kaba dei peit, u CEM u la ong ba ka dei ka tnat GAD bad halor ka jingthied ïa ki tiar la shim kat kaba donkam.
Ha kaba iadei jingdon ki kor kompiwtor hapoh KHADC, na ka liang ka EM ba khmih ïa ka IT ka Kong Grace Mary Kharpuri, ka la ong ba ka Tnat kam pat thied satia ïa ki computer ba thymmai bad halor ka jingdon ki computer hapoh ophis ka EM ka la pynpaw ïa ka jingsngewkhia ba na ka liang ki nongtrei ka KHADC kim pat lah ban wanrah ka jingkheiñ ïa ka jingdon ki computer wat ba hadien ba ka la pan jingkheiñ la bun sien.
Haba ïaiban halor kane ka EM ka la ong, “Haduh mynta ngam pat ïoh ïa ki nombar jong baroh ki tnat halor ka jingdon ki computer wat haba nga la pan jingkheiñ, hynrei kaba nga lah iai ban ban ai jingkheiñ ka dei 11 tylli hapoh ki kamra ki EM bad ka Tnat bad IT bad haba ka don ka auction ruh ngam ïoh jingtip.”
Na ka liang ka EM ka la kyrpad ruh ïa ka EC ban mang pisa ïa ka IT ban lait na ka pynlut na pla.
U la kynnoh ruh ba ka jingbym lah ban ai jingkheiñ kloi ka lah ban don ka jingrah ne pynjah ïa ki computer naba kino kino ki tiar ka Council kim dei ban jah kumta hap peit bha haba thied ïa ki tiar ka ophis