Mawkyrwat, Nailar 5, 2024
Hadien ka jingsaphriang ka video ha ki social media ba la kynnoh ba kren tohmet u doktor ia ka nongshim dawai, kaba la jia mynne mynstep, ka KSU Mawkyrwat Circle mar mar ka la hiar jurip ban tohkit kaei kaba jia, da kaba iakynduh ia ki nongpeit ia ka hospital, u doktor bad ki nongshim dawai, bad hadien ba la tip ia ka jingshisha, ka KSU kam pynrem iano iano bad ka kyntu jur ia ki paitbah nongpang bad ki nongtrei kane ka Hospital ba kidei ban ia burom markylliang.
Katkum ka jingtip ba la ioh lum lyngba ki briew ba leit shim dawai, la iathuh ba kane ka jingjia iania hapdeng u doktor bad katei ka nongshim dawai ka la jia namar ka jingbym ia burom ia ka Ktien ka thylliej, khamtam na ka liang katei ka nongshim dawai ka bym lah ap wat hadien ba la bthah da ki doktor bad khamtam haba ka la iohi ba ki doktor ki dang bunkam ban sumar ia ki nongpang ba jur hapoh ka Emergency.
Kumta, na ka liang jong ka KSU Mawkyrwat Circle lyngba u General Secretary, u samla Plosbor Kharjahrin da ka jingsngew khia ia kane ka jingjia kaba mih tang na ka daw jong ka jingbym ia sngewthuh ktien, ka la kyntu jur ia ki paidbah ka thaiñ kumjuh ruh ia ki nongtrei kane ka hospital ba nangne shakhmat kidei ban ia burom markylliang ha ktien ka thylliej khnang ba kan nym mih biang kaba kum kane ka jingjia