Ki dkhot jongka KSU Ranikor Circle hynne ka sngi 14/08/2024 haka por kumba 1 baje eiei nohphai sngi ki la ioh ban bat ia shikynhun ki bym dei khasi ha Ranikor kiba dang wan kiew naka thain khappud naka shnong Maheshkhola , South West Khasi Hills District kaba dei ka shnong ba ha khappud jongka Ri Bangladesh.
Ka Seng haba ka la bat ia kine ki briew kiba wan kiew naki thain khappud Bangladesh bad da ka jingartatien ba ioh ki dei ki khar Bangladeshi kiba wan rung tuh kum ki Nongbylla , bad hadien ba la lap ba kim don iaki kot ki sla kiba biang la aiti noh sha ki pulit jongka Ranikor Police Station ba kin leh ia kaba donkam.
Ka seng ka kwah ban kyntu ruh iaki shipai iada khappud ( BSF) , iaka Police Department bad ruh iaka District Administration jongka South West Khasi Hills District ba ki dei ban shimkhia halor kane ka mat ba wan kiew ki briew bym dei ki trai ri trai muluk khamtam naki thain Border namar kum ka seng ngi don ka jingsuba jur ba ki lah ban don ki khar Bangladeshi kiba wan kiew hadien ba ka la don ka jingkulmar hapoh Ri Bangladesh ha kine ki por.
Ka KSU ka maham ruh iaki Contractor bad ki nongai kam ba kim dei ban pyrkhat tang iaka iohnong shimet jongki da kaba khot iaki khar Bangladeshi ban wan trei ne ban wan bylla hynrei ki dei ban husiar ioh kan mih kaei kaei ka jingeh hadien ha bud. Ka seng ka maham ba lada ki iarap iaki bym dei trai ri trai muluk ban wan rung kum ki nongbylla naka liang ka seng kan sa leh ia kaba donkam.
Ka seng kan nang iai peitngor ban pyni daka kam ban iada iaka thain khappud bad lada ki bor District, ki bor pulit bad ki shipai iada khappud kim shimkhia ne kimlah ban leheiei halor kane ka mat naka liang ka seng kan leh ia kaba donkam bad kan shim hi iala ka bynta