Nailur 25: Haduh 6 tylli ki mat rah ka Ka Khasi Students Union (KSU) myn sngi Balang sha u Lat ka Jylla CH Vijayashankar ban tuklar kala aiti lyngba ka dorkhas ha kaban pyntreikam noh ia ka Inner Line Permit (ILP), ban pyndam ia ka Citizenshop Amendment Act (CAA), ban pynrung ia ka ktien Khasi ha ka 8th Schedule, ban pyllait noh ia ka Indo-Nepal Friendship Treaty, 1950, ban pynbeit noh ia ka jingiakajia pud bad ban seng ia ka Central Agricultural University ba shirta ha Jylla.
Na ka liang ka KSU lyngba u General Secretary ka KSU Donald V Thabah ula batai ha ka dorkhas ia ki sienjam bala shim da ka KSU ban kyrpad ia ka Sorkar Pdeng halor ka jingdonkam ban pyntreikam noh ia ka ILP ha Meghalaya. Hynrei, haduh mynta ka KSU bad ki paidbah kin dang ban ioh ia ka jubab kaba sngewtynnad na ka Sorkar Pdeng.
Ka Seng lyngba u Lat ban iakren bad ka Sorkar Pdeng” ban lah pyntreikam noh mar dor ia ka ILP ha ka Jylla Meghalaya. U Bah Donald u iathuh ka Jylla Meghalaya kam slem kum ka Tripura bad Assam ha kaba ki jaidbynriew riewlum trai jylla kila jan kylla rit paid na ka jingwan ki briew ba nabar.
Ha Dorkhas la dawa ban pyndam noh ia ka CAA, 2019, ka Ktien Khasi ha ka khyrnit ba phra jong ka Riti Synshar ka dei ka jingdawa kaba shonghok, kaba la dei kren hakhmat ka Sorkar India naduh u snem 1960 da ka Khasi Author Society.
Shuh shuh ka Seng ka la buh hakhmat u Lat ka Central Agricultural University ha Meghalaya kin urlong shisha.
Ha u 2010, ka Sorkar Pdeng lyngba ka Ministry of Agriculture kala mynjur ban seng ia ka Central Agricultural Univerity ha Jylla Meghalaya ha ka jaka kaba 200 acre ha Kyrdemkulai, Ri-Bhoi District.
U pyntip ba ka KSU ha ka 16 tarik Naitung, 2019 kala thoh sha u Myntri ka Ministry of Agriculture Narendra Singh Tomar halor kane ka kam hynrei haduh mynta ym pat ioh satia ia kano kano ka jubab.
Une u Nongialam ka KSU ula kyrpad ruh ia u Lat ka Jylla ban iakren lem bad ka Sorkar Pdeng ban pyllait noh ia ka Meghalaya na ka jingtreikam jong ka Indo-Nepal Friendship Treaty, 1950.
“Kumba long ka CAA, ka India-Nepal Friendship Treaty 1950, kaba ailad ia ki nong Nepal ban ioh long nongshongshnong ka India khlem kino kino ki kyndon, kala ktah jur hangne ha Jylla Meghalaya. Naduh u snem 1980, ka Meghalaya kala sakhi ia ka jingnang heh paid ki paid Nepali hapoh ka Jylla, kaba buh ha ka jingma ia ki riewlum rit paid jong ka Jylla, kaba lam sha ki jingiakynad hapdeng ki ar kynhun. Ki paid Nepali kila pynkha ruh ia ki jingeh ha ki jaka khappud ka Meghalaya ban tynjuh bor ia ki riewlum trai jylla halor ka hok iala ki jong ki jaka bad ka Jylla” ula ong.
U pud u sam hapdeng ka Meghalaya bad Assam