Ioh myntoi ka shnong DYMPEP kitkhlieh ka NEEPCO ban ai song pynroi ki Jaka jngohkai ban pynkhuid.

Ka North Eastern Electric Power Corporation Limited (NEEPCO) ha ka sngi Balang ka la shimti na ka bynta shi snem kynthih ban theh ia ki song pynroi ha ka shnong Mawkdok-Dympep.
Ka thong jong ka NEEPCO ban shimti ia kine ki ar tylli ki shnong ka long ban wanrah ia ka jingkhuid jingsuba ia ka shnong ka thaw ha kaba yn sa shim ruh saw ngut ki nongshong shnong na ka shnong Mawkdok-Dympep ban siew da ka tulop ba kin pynkhuid ia ka shnong ka thaw manla ka sngi.
Ka shnong Mawkdok ka dei ruh kawei na ki jaka jngohkai pyrthei kaba ju khring bha ia ki nongjngohkai pyrthei manla ka sngi namar ka jingdon jong ka jingkieng Duwan Sing Syiem bad ka dei ruh ka lynti iaid ban leit sha ki jaka jngohkai pyrthei kiba don ha ka shnong Sohra.
Lyngba kane ka dei ka sienjam, ka NEEPCO ka la pyndait ruh da ki bording ba pynthaba jingshai ia ka jingkieng Duwan Sing Syiem kaba la pyniap biej haduh katta katta ia ki nongleit nongwan bad ia ki nongjngohkai pyrthei.
Kum ka jingpynsdang ia ka jingpynkhuid ia ka shnong Mawkdok bad Dympep, ka NEEPCO ka la aiti ia ki borti theh ñiut ban thep ia ki tiar kiba pyut bad ki bym pyut.
Ia ka bording ba pynthaba jingshai ia ka jingkieng Duwan Sing Syiem la plie paidbah u Director (Personel) u Major General RK Jha AVSM (Retd), katba ia ki borti theh ñiut la aiti da ka Kong Patricia Mukhim kaba la long kum ka Kongsan ha kane ka sngi.
Ha kane ka sngi, ka NEEPCO ka la pynkup burom ruh ia ka Kong Silbi Passah kaba la ioh pdiang dang shen ia ka khusnam Padma Shri na ka President ka ri India bad kumjuh ruh ia ka Kong Patricia Mukhim kum ka jingithuh ia ka jingtrei shitom ban pynkhuid ia ka wah Urkaliar.
U Major General RK Jha u la ai jingiaroh ia ka NEEPCO kaba la shimkhia ban pynsahnam ia ka jingkieng Duwan Sing Syiem bad ban wanrah ia ka projek na ka bynta ban pynkhuid ia ka shnong Mawkdok-Dympep ka ban long kum ka nuksa ia ka ri India baroh kawei nangne shakhmat.
Ka Kong Patricia haba kren kum ka Kongsan ka la ong ba kane ka sienjam jong ka NEEPCO kan long kum ka jinghikai ia ki shnong ki thaw ba kin ri bad kin sumar ia ki khlaw ki btap bad ia ka jingkhuid jingsumar ia ka mei mariang.
Ka la kyntu ruh ia ki nongshong dukan hajan ka jingkieng Duwan Sing Syiem ba kin hikai lem ia ki nongjngohkai pyrthei ban leh khuid ia ka mei mariang bad kyntu ruh ba kin kiar noh na kaba die ia ki jingbam ba la song ha ki plastik bad ban hikai ia ki nongjngohkai pyrthei ban mad ia ki jingbam tynrai ba la song ha ki sla.