Shillong, Risaw 20: Ka seng All Meghalaya SSA Teachers Association (AMSSATA) kaba la shong
jingiakhih ha Madan Phutbol Malki ka la weng ia ka jingiakhih hadien ba ka Myntri ka tnad Aiñ ka Dr. Ampareen ka la kular ban shimkhia hakhmat kitei ki nongialam.
Ka jingiakhih jong kitei ki nonghikai kala kynjoh sha ka 21 sngi namar ka jingdawa jong kine ki nonghikai ka long ban pynkiew ia ka tulop da 100% namar mynta la phra snem ka tulop jong ki kala sah kum juh khlem pynkiew shuh, kine ki nonghikai kila air uh da ka jingthoh sha ka sorkar ban dawa ia kane ka jingpynkiew tulop.
Kane ka jingiakhih kala sdang ha ka 1 tarik mynta u bnai bad kala neh haduh mynta ka sngi ka 20 tarik Risaw 2024, ha pdeng kine ki sngi kum ka seng kala ai jingthoh sha u Lat ka jylla ba un tuklar lem ia kane ka kam bad kila ia kynduh ruh ia u bah Paul Lyngdoh myntri ka sorkar.
U President ka AMSSASTA Bah Peter Thyrniang hadien ka jingiakynduh iaka Myntri Sorkar kaba dei ruh ka Nongaiktien ka Sorkar MDA, Kong Ampareen Lyngdoh.
, u Bah Peter u la ong ba ka daw ba la rai ban weng noh iaka jingiakhih kadei hadien ba ka Myntri Sorkar Kong Ampareen Lyngdoh kala pyntip shaka Association ba ka Sorkar kala mynjur iaka jingdawa jong ki Nonghikai SSA bad kan sa shim rai ha kine ki khyndiat bnai ban wan.
Hynrei ula ong ba ka Myntri kala pyntip ba ka Sorkar kam pat lah ban pynbna ia kane ka jingpynkiew tulop namar ka jingtreikam ka Model Code of Conduct (MCC) jong ka elekshon shiteng samoi ha Gambegre constituency.
Ula iathuh ba ka Myntri kala kren shai ba ka Sorkar kam pat lah ban pyntip haduh katno kan kyntiew ia ka tulop bad lano yn kyntiew.
Lah ban kdew hangne ba ka sorkar jylla kan donkam ban pynlut sa kumba T.300 Klur na ka bynta ban pynkiew ia ka tulop jong ki nonghikai SSA. Kane ka long kat kum ka jingai jingkhein jong ka Tnad Pule Puthi ka Jylla.
Haba kylli, u nongialam ka AMSSASTA ula ong, “Ka Association ka ieng skhem halor ka jingdawa ban pynkiew ia ka tulop da 100 % haba buh hakhmat ba ka jingpynkiew tulop ba khatduh ka dei phra snem mysnhuwa, kata ha u snem 2016″.
Kat kum ka jingong jong u, ki nonghikai skul Lower Primary kila ioh tulop mynta tang T.19,994 katba ki nonghikai UP kila ioh T.20,493.