Ka NPP, kaba la ialam da u Conrad Sangma, ka la weng noh ia ka jingkyrshan jongka ia ka sorkar Manipur, kaba la ialam da ka BJP, da kaba pynpaw ia ka jingsngewkhia kaba jur, halor ka jinglong jingman jong ka suk ka sain, kaba la don ha katei ka Jylla.
Ha ka shithi ba la phah sha u president ka BJP u JP Nadda, ka NPP ka la ong ba ka sorkar Manipur, hapoh ka jingialam jong u myntri rangbah ka jylla u N Biren Singh, ka la pheil, ha kaba tehlakam ia ka jingshah thombor jong ki jaitbynriew bad sa ka jingduh noh ïa ki mynsiem ba lui lui bad kumta ka seng ka la pynbna ïa ka rai ban weng noh ïa ka jingkyrshan na ka sorkar.
“Da kaba buh ha ka jingmut ïa ka jinglong jingman kaba mynta, ka National People’s Party ka la rai ban weng noh ïa ka jingkyrshan jong ka ïa ka Sorkar ba la ïalam da u Biren Singh ha ka Jylla Manipur, da kaba treikam mardor,” ong ka shithi, ba la phah da U Conrad Sangma, nongialam ba heh duh ka NPP sha U JP Nadda, President jong ka seng BJP