U Deputy Commissioner ka South West Khasi Hills District, ryngkat ka jingïatreilang bad ka District Disaster Management Authority (DDMA) lem bad ka 1st Battalion jong ka National Disaster Response Force (NDRF) na Guwahati, mynta ka sngi ka 22 tarik Nohprah, 2024 ki la pynlong ïa ka mock drill halor ka jingkhynñiuh jumai kum shibynta jong ka National Disaster Management Authority’s (NDMA) Level Earthquake Mock Exercise ha ophis u Deputy Commissioner ha Mawkyrwat, South West Khasi Hills District.
Ha kane ka Mock Exercise, la pyntreikam ïa ka kynhun ïaleh pyrshah ïa ki jingjia ne ka Incident Response Team (IRT) da u Incident Command (IC), ba la ïalam da u bah L.T. Tariang, MCS, Additional Deputy Commissioner ka South West Khasi Hills District bad u CEO jong ka District Disaster Management Authority (DDMA). Ka jingpynkhreh baroh ki la bud ryntih ïa ki jingbthah jong u IC, ha kaba la pyntreikam ruh ïa baroh ki bynta jong ka Incident Command kiba kynthup ïa ka 1st Battalion NDRF ba la lamkhmat da u Lal Ringsan, INSP, ka Operations Section Chief (OSC), ka Logistics Section Chief (LSC), ka Planning Section Chief (PSC), ka Staging Area (SA), ka Medical Aid Post (MAP), ka Offsite Control Room (COR), bad ka Relief Camp Manager (RCM).
Ïa kane ka Mock Exercise la pynlong kyrpang ha Ophis jong u Deputy Commissioner, South West Khasi Hills District, ha kaba ki don 12 ngut ki briew kiba la mynsaw, kynthup ïa ar ngut ki kynthei bad iwei i khunlung. Kane ka drill ka kynthup ïa ka jingpynkynriah, ka jingwad bad pyllait im, ka jingai jingsumar nyngkong, bad ka jingkit ïa ki briew kiba mynsaw lyngba ki Ambulance sha Medical Camp bad Mawkyrwat Civil Hospital.
Ha kane ka Mock Exercise la ïohi ïa ka jingïashimbynta kaba radbah na ki tnad lain bapher bapher, kynthup ïa ki ophisar bad ki nongtrei jong ka distrik, ki pulit, ki nongïada paidbah bad ki nongap pahara ïing, ki nongpynlip ding bad ki kam ba kyrkieh, ka tnad ka koit ka khiah, bad ka kynhun NDRF na Guwahati.
Hadien kane ka Mock Exercise la pynlong ïa ka jingïalang pynshai ha ka kamra jong ka Additional Deputy Commissioner’s Room kaba don ha DC Ophis ha Mawkyrwat, ba la lamkhmat da u bah L.T. Tariang, MCS ryngkat u Dr. E.S. Langshiang, District Disaster Management Officer (DDMO) ka South West Khasi Hills District.