Ki Samla jong Ka All India Trinamool Congress (AITC) Nongthymmai, ha ka 2 tarik Naitung ka la pynlong ia ka jingleh burom ia ka samla Jaruien Khongsit kaba la jop ia ka nam Miss India Exquisite, 2022.
Ia kane ka jingialang leh burom la pynlong ha Nongrah ha kaba la iadon lang ruh u MLA jong ka Nongthymmai Constituency uba dei ruh u President jong ka AITC, Meghalaya, bah Charles Pyngrope.
U President jong ka AITC Nongthymmai Block, Bah Bawan Khyriem haba kren ha kane ka jingialang u la ong ba na ka liang jong ka AITC Nongthymmai hapoh ka jingialam jong u bah Charles Pyngrope ka kloi ban kyrshan ia Samla Jaruien ha kano kano ka por ba ka donkam.
U Bah Bawan Khyriem u la kyntu ia ka samla Jaruien ba kan kynmaw ia la ka jong ka tynrai wat la ka la poi sha kane ka thong bad u la kitbok kitrwiang ruh ha kiwei pat ki rynsan iakhun nangne shakhmat.
Ia kane ka jingialang leh burum la pyniaid da u bah Allan Lyngdoh uba dei u President jong ka AITC Youth bad na ka liang jong u bah Charles Pyngrope u la ai ruh ia ka jingiarap na ka bynta kane ka samla.