Shillong, Jymmang 23: Ka sorkar MDA ba la ialam da ka NPP ka la pynlut palat 1000 klur tyngka na ka bynta ki jingtei ia ki kam ialehkai ha kine ki hynriew snem ba la dep.
“T.1000 klur la pynlut na ka bynta ki jingtei ha ki kam ïalehkai naduh u snem 2018,” ong u Myntri Rangbah ka Jylla Conrad K Sangma haba ïakren bad ki nongthoh khubor ha ka sngi thohdieng.
U la ong ba T.2 klur na ka jinglut jingsep baroh la ai sha ki seng ialehkai jong ki jylla man la u snem da kaba pyndap ba T.50 klur plus la pynlut ruh man la u snem ha ki jingialehkai, kynthup ia ki jingtei ba la rim da kaba pyndap ba T.8 klur plus ruh la ai lang kum ki jingai jingkyrshan pisa.
Haduh mynta, dang thaw 300 tylli ki jaka ialehkai ha kylleng ka jylla. Baroh ki don 10 tylli ki jingïalang ha ka ri bad ha ka pyrthei ba la pynlong da ka jylla naduh u snem 2022. Palat 2500 plus ki la ïoh kam lyngba kum kine ki jingïalang man la u snem.
Haba phai sha ki snem ba la dep shwa ba ka sorkar MDA kan shimti ia ka bor, u CM u la ong ba ki don tang 100 klur tyngka ba la mynjur na ka bynta ki projek pynroi ia ki jingialehkai bad ki don ki grant kiba la ai sha ka seng ialehkai jong ka jylla.
“Ym shym la don ki prokram wad/ai jinghikai ïa ki sap ba la bei tyngka da ka sorkar,” u la ong haba bynrap ba katba mynta, ki don palat 24500 ngut kiba ïashim bynta ha ka prokram ID sap.
Kat kum ka jingong jong u, ka jingïalehkai kaba shisien ka pyrthei kaba la long ha kane ka jylla ka dei ka South Asian Games ha u snem 2016.
Shuh shuh, u CM u la pyntip ba ka sorkar ka dang wanrah ia ka madan phutbol kaba lah ban shim 40 hajar ngut ha ka jinglut kaba palat 400 klur tyngka ha Mawkhanu ha u snem 2028. Kane ka madan phutbol kan long kaba heh tam ha ka ri. “Ngin sa wanrah ruh ïa ka madan ïalehkai ha Mawdiangdiang, ha kaba yn don ïa ka aquatics complex bad ka lawn tennis complex (ban tei ha ka jinglut kaba 150 klur tyngka),” u la ong.
Kumjuh ruh, u CM u la pyntip ba palat T.6 klur la ai sha ki 3500 plus ki nongialehkai bad ki coach hapoh ka Cash Awards Scheme bad palat T.2.5 klur la ai sha jan 350 ngut ki nongialehkai hapoh ka Sports Scholarship Scheme.