Shillong, Jan 25: Ka Raj Bhavan hangne ryngkat ka jingiatreilang bad ka Shillong Agri Horticulture Society bad ka State Directorate of Horticulture ki la pynlong ia ka jingpyni syntiew kaba nyngkong eh ha Raj Bhavan.
Ia kane ka show la plie da u Lat ka jylla Meghalaya, u CH Vijayashankar uba la sngewtynnad ia ka jingaiti lut bad ka jingtrei shitom jong ki riew ieid syntiew kiba la ri bad pynneh pynsah ia kiba bun ki syntiew da ki phew snem.
Palat 300 tylli ki jingpyni nam la pyni ha kane ka sngi da ki 30 ngut ki dkhot jong ka Shillong Agri Horticulture Society.
Haba kren ha kane ka sngi, u Lat ka jylla Meghalaya, u CH Vijayashankar u la ong ba ka Raj Bhavan ka dei jong ki paidbah ka jylla Meghalaya bad yn plie ia ki jingkhang jong ka Raj Bhavan na ka bynta ki nongwan jngohkai ban wan ban mad ia ka Raj Bhavan palat ia ka ar sngi ha ka shisnem.
U Lat u la pyntip ruh ba nangne shakhmat, kane ka jingpyni syntiew kan long kaba man la u snem ha Raj Bhavan.