Shillong, Lber 07 :Halor ka rai jong ka Sorkar ban thung ia ki consultant bad ka jingdonkam ban hikai ia ki samla ka jylla ba kin trei ia ki kam consultant bad ioh 10 hajar klur ki project hapoh ka 7 snem namar ki Consultant ka Iing Dorbar Thaw Aiñ ka jylla ka la long ka jingiawoh nia hapdeng ka liang synshar bad ka Liang Pyrshah na ka jingwanraj u MLA ka VPP na Mawlai Konstituensi.
U Bah Brightstarwell Marbaniang haba buh jingkylli ia U Conrad K Sangma ha ka kynta jingkylli ia ka sobjek kam Independent Consultant katno tylli ki don post bad ki iadei aiu bad ki Tnad sorkar.
Kiba la kyrshan ia kane ki long u Bah Ardent Miller Basaiawmoit bad u Dr Mukul Sangma.
Ha ka jingkynnoh kynthoh u Bah Ardent Miller Basaiawmoit U MLA ka VPP na Nongkrem u ong ba ka Sorkar kala siew da ki lak tyngka ia ki consultant katba ia ki samla trai Jylla siew tang da ki hajar tyngka.
Katba u Dr. Mukul Sangma Nongialam ka liang Pyrshah kynnoh beit ba ki consultant kila sei tulop kham bun ban ia ki Ophisar ka Jylla,.
Haba iakynther nia hapdeng ka NPP bad ka VPP u Bah Brightstarwell bad u Bah Ardent ki kwah beit haba shit haba shai katno ka sorkar ka mang tyngka katno ia ki consultant katba ia ki samla jylla ka Duna.
Na ka liang u Myntri Rangbah ka Jylla Conrad K Sangma haba pynshai ia ki kynnoh kynthoh ula iathuh ioh palat T. 7,427 klur ki project ha kine ki hynniew snem bala leit noh bad T. 2400 klur la bei ruh da ka Sorkar Pdeng na ka bynta ka Meghalaya Economic Growth Corridor namar ki kam ki stad ki jhad lyngba ka jingthung consultant
Ka Dorbar Mang Tyngka kaba 6 ka long kaba tih Tyllong bha ia ki liang Pyrshah ban buh jingkylli ia ka Liang Synshar u Conrad K Sangma u iathuh haduh 39 ngut ki consultant shimet bad 69 tylli ki kompani consultant la ai kam hapoh ka Jylla mynta.
Shuh shuh u Conrad ula pynksan ha kine ki hynniew snem, ka Sorkar kala lah ban wanrah haduh 13 tylli ki project ba bei tyngka na shabar (Externally Aided Project) hadien ka jingiathong bad ki Ri bapher bapher.
“Namar jong ka kam kine ki stad ki jhad, ngi la ioh ia ka song pisa ba palat T.7,427 klur” ula bynrap.
U pynsngew ba iakynduh ia ka Myntri pla tyngka la bthah ban aiti noh mar mar ia ka Detailed Project Report (DPR) haba iadei bad ka Meghalaya Economic Growth Corridor project hapoh ar kynta. Tang namar ka jingdon ki consultant ba ngi thung, ngi la lah ban pyndep hapoh ka 7 sngi bad ngi la ioh ia ka mang tyngka ba T.2400 klur na ka Ministry of Finance”.
U Conrad ula pyntip ruh ba ka Meghalaya ka dei ka Jylla ba nyngkong ban buh ia ka jingtyrwa ia ka project Utility Mall ba T.132 klur bad pyntip ba ia kane ka mall yn sa pyniaid da ki samla ka Jylla.
ula ong ba ia kane ka kam la leh lyngba ka jingkhot tender bad dei ka kompani kaba siew ia ki consultant ym ka Sorkar.
Nalor kane, u Myntri Rangbah ula ong ba kane kam don jingktah satia ia ka pla tyngka jong ka Jylla naba tang 1% na ka dor jong ka projecr la siew sha ki consultant.