Shillong:U Myntri Rangbah ka jylla u Conrad Sangma ha ka sngi kut jong ka Dorbar mang tyngka u la wanrah ia ka jingpynkylla (amendment) halor ka ain ain Meghalaya State Investment Promotion Facilitation (MSIPF) Act of 2024 bad kane ka la pynlong ruh ia u Nongialam jong ka VPP u Bah Ardent Milliser Basaiawmoit ban weng noh ia ka Amendment kaba u la wanrah ha Iing Dorbar thawain mynta ka sngi.
Lah ban kdew hangne nalor ka VPP ka seng ki samla pule Khasi Student Union (KSU) ruh ka la pynpaw ia ka jingpyrshah halor kane ka ain. Ka KSU ka la thmu ruh ban leit tur sha Assembly ban pynpaw ia ka jingpyrshah.
Na ka liang jong u Conrad Sangma haba kren ha ki nongthoh khubor mynta ka sngi u la ong hadien ba ka la mih ka jingpyrshah na ki paidbah halor kane ka ain khamtam halor ka kyndon ba ka lah ban don ka jingpynkhein ia ka ain Land Transfer Act na ka liang jong ka sorkar ka la wanrah noh ia ka jingpynkylla lane ka amendment halor ki katto katne ki bynta.
Kawei na ki jingpynkylla ka long ba wat la ka sorkar ka la wanrah ia kane ka ain, hynrei ka ain Land Transfer Act kan dang treikam nalor ki kyndon ka district council ruh kin treikam lang. shuh shuh u la ong ba kane ka ain kan khmih ruh halor ka rukom bhah kam bhah jam namar ka jingthmu ban wanrah ia kane ka ain ka long na ka bynta ban thaw ia ki lad iohkam ioh jam la bynrap u Conrad.
Shuh shuh u la ong ba la pyndam noh ia ka kyntien ba kane ka ain MSIPF kan dei kum ka thup pynlang jaka (land bank) bad ban aiwai pat sha ki briew kiba kwah ban wan seng kam ha ka jylla.
Mynta kane ka ain kan long noh tang kum ka nongprat lynti na ka bynta ki nongwan seng kam sem jam ryngkat ruh ban peit ba ki kyndon ain kum ka land transfer Act, ka lad ioh kam ioh jam kin treikam la ong shuh shuh u Conrad.
