Shillong: Haba phai sha ka sain hima sima ha ka jylla ki la don bun ki jingkylla khamtam naduh ba ka seng sain pyrthei kaba thymmai ka VPP ka la lah ban ioh ia ka jingkyrshan na ki paidbah la ka long ha ka ilekshon MP bad kumjuh ruh ha kane ka ilekshon MDC kaba dang shu dep shen ha ha kaba ka la ioh syndon ban ialam ia ka EC ha KHADC.
Haba kren ha ki nongthoh khubor mynta ka sngi u Dr. Mukul Sangma u la ong ki paidbah ki la ailad ia u ban ngan ioh long MLA naduh u snem 1993 bad u la don ruh ha ka sorkar bad kane ka dei ka jingai sngewbha jong ki paidbah, u la bynrap.
Haba kylli halor ki jingthmu jongu nangne shakhmat la un dang neh ha ka TMC, ne pyniasoh noh bad kiwei pat ki party u la ong na ka bynta ki politician ka long kaba kongsan ban sngewthuh janai kumno ban iaid shakhmat ha ka liang ka sain hima sima.
“Kum ki nongmihkhamt ngi dei ban leit biang sha ki paidbah. Ha Meghalaya teng teng donkam ban pyrkhat janai namar kam dei tang ka party, hynrei ka dei ruh ha u briew bad katkum ka jinglap jongnga ha ka jingiadei bad ka jingdon bad ka party teng teng ka long kaba eh ban pynsngewthuh ia ki party heh na Delhi ba kin sngewthuh ia ki mat ki jura jong ka jylla kaba rit kum ka Meghalaya” u la ong
U Dr. Mukul u la ong na ka bynta ka Meghalaya dei ban sngewthuh kumno ban iada kyrpang ia ki trai ri trai muluk. Kumta na kane ka jingkren jong U Dr. Mukul Sangma ym pat lah ban shai kaei ka jingthmu kaba u don nangne shakhmat.
Hynrei na ka rukom kren jongu lah ban ong ba u Dr. Mukul Sangma u lah ban nym pynaiasoh shuh bad ki National Party bad lehse un lah ban pyniasoh bad ki party trai ri lane u lah ruh ban thaw da kawei pat ka party thymmai, hynrei halor kane ngin sa dang buddien halor ki sienjam kiba une u politician uba la ih bha ha ka sain pyrthei un shim.
