Shillong, Lber 26: Ka Executive Member (EC) thymmai jong ka KHASI Hills Autonomous District Council (KHADC) ba la lam khmat da ka Seng Voice People Party ka la pynphai jubab ia ka jingkylli ba la wanrah da u MDC ka Mairang u Bah Equator L Nongrang ha ka Dorbar Mang Tyngka kaba la sdang hynne ka sngi Balang. Ia katei ka jubab jong ka EC thymmai ba la lam khmat da u Bah Shemborlang Rynjah la jubab da u Executive Member (EM) ba khmih ia ka tnad Council Development, u Bah Pynkhrawboklin Kharjahrin. U Bah Kharjahrin u iathuh ba ka jingbuh ia ka Ophis KHADC ha Mairang kaba dei ka District Thymmai Eastern West Khasi Hills. kan sa shong pyrkhat namar ka dang dei tang ka jingiakren. U MDC ka Mairang haba kylli ia ka EC kumno ka pyrkhat namar ka la don ka jingiakren bad ka jingiasoi ba ka Shnong ka la ai jaka ia ka Konsil. Na ka liang u Bah Titosstarwell Chyne u la kyrshan Lang ia ka jubab.U Bah Pynkhrawboklin ula ong “Ia kaba mynta ka EC kam pat don jingthmu ban tei ia ka Branch Office ha Mairang hynrei ka EC kan sa shong jingialang halor kane ka mat”.Ula iathuh ba ha ki snem bala dep, kala don ka jingleit jurip ia ka jaka bad kala don ruh ka jingiakren hynrei haduh mynta kam pat don satia kano kano ka jingiateh ban tei ia ka Branch Office.
