Shillong – Ha ka 8 tarik Naiutng, 2022 kaba dei ka sngi kut jong ka Dorbar Lyiur jong ka KHADC ka la pynkyndit ia ka Iingdorbar baroh kawei namar ka Council ka la dep thied ia ka jaka ha South West Khasi Hills District Mawkyrwat, hynrei kam don satia ia ka dulir kot jaka.
U CEM ka KHADC bah Titostarwell Chyne haba jubab ia ka jingkylli jong u MDC Congress na Mawkyrwat bah Carness Sohshang u la ong ba, ha u snem 2014 ka ophis ka la thied ia ka jaka, hynrei ki dulir kim don satia ha ophis.
Na ka dulir kaba la shu ioh tang ka Xerox copy ka paw ba ka KHADC ka la dep ban siew ruh ia ka bai jaka kaba long kumba T.35,25,039/- tyngka bad ka jingheh kane ka jaka ka long 11,750.13 phut sawdong.
La pyntip ba, ia katei ka jaka ba la thied ha u snem 2014 dei ha ka por ba long CEM u bah Ardent Miller Basaiawmoit ha kaba u la soi ha ka dulir thied khyndew bad ia ka kot jaka ba shu xerox la ioh pdiang ha ka por ba long CEM U Bah PN Syiem ha u snem 2015.
Kumba ka long mynta ka KHADC ka la shna ia ka ophis treikam jong ka District council ha Jakrem kaba kaba dei ka jaka kaba la shu ai sngewbha bad ka don ruh ka jingiateh kular ba hap ban ai jam ia ki kiba haiing jong ki trai jaka.
Na ka liang jong U CEM u bah Titostarwell Chyne u la ong ba na ka liang jong ka Council kan sa pynlong ia ka jingtohkit halor kane namar ha ka jaka ban shna ha ka jaka kaba la dep thied la tei pynban ia ka jaka kaba hap ban kular ai jam ia ki trai jaka bad kumjuh ruh ban ioh ban shimti noh ia katei ka jaka kaba la dep thied.