Ïap u nongtrei ba ha khlieh duh jong ka LeT u Saifullah Khalid ha ka jylla Sindh jong ka Pakistan

Ïap u nongtrei ba ha khlieh duh jong ka LeT u Saifullah Khalid ha ka jylla Sindh jong ka Pakistan
U lehnoh jong ka Lashkar-e-Taiba, U Saifullah Khalid, uba la don kti ban thombor ha Nagpur, Rampur, bad Bangalore, Uba la pyndonkam kyrteng thok kum u Vinode Kumar, u sah ha Nepal da ka jingithuh bakla shwa ba un leit phai shnong sha ka Jylla Sindh jong ka Pakistan, u la shah pyniap.
u Saifullah Khalid, uba la shah kynnoh ba u la pynlong ia ki katto katne ki kam pyntriem kiba pawnam ha India, u la shah pyniap ha ka jylla Sindh jong ka Pakistan, ong ki tyllong khubor ha ka India Today TV ha ka Sngi U Blei. U la shah thombor ha ki katto katne ki riew thombor ki bym lah ban tip ha ka nongbah Matli jong ka elaka Badin ha Shind.
Katkum ki tyllong khubor, la iathuh ba u Abu Saifullah u la shah bthah tyngeh na ka seng bad khanglad ia ka jingleit jingwan jong u. shuh shuh La pynbiang ruh ia ka jingpahara ia u. Hynrei mynta ka sngi, katba u dang mih na iing jong u ha ka nongbah Matli, u la shah thombor bad shah siat iap ha kawei ka jaka ieng kali kaba don hajan.
U Khalid u dei u wei u ba don kti haki kam thombor ba kongsan ha ki lai tylli ki jingthombor ba khraw: ka jingthombor jong ka Indian Science Congress (ISC) ha u snem 2005 ha Bangalore, ka jingthombor ha u snem 2006 ia ka jaka treikam jong ka Rashtriya Swayamsevak Sangh (RSS) ha Nagpur bad ka jingthombor jong ka ktem jong ki CRPF ha Rampur ha u snem 2008.
Da kaba u treikam hapoh ka kyrteng thok “Vinode Kumar”, u Khalid u la sah ha Nepal la katto katne snem, ha kaba u la im hapoh ka jingithuh bakla bad u la shongkurim ruh ia kawei ka kynthei trai shnong, kaba kyrteng ka Nagma Banu.
Dang shen, u Khalid u la pynkynriah ia ka ktem jong u sha Matli kaba don ha ka Elaka Badin jong ka jylla Sindh ha Pakistan. Hangtei, u la bteng ban trei na ka bynta ka Lashkar-e-Taiba, ka kynhun lehnoh jong ka Pakistan kaba la khang pyrshah da ka UN bad ka seng ba hakhmat eh jong ka, ka Jamaat-ud-Dawa, kaba pynleit jingmut nyngkong eh ha ka jingpynrung kam bad ka jinglum pisa na ka bynta ki kam lehnoh.