Lait im salit ka liengsuin kaba mih na delhi sha shrinagar namar ba jur palat ka eriong

Kawei ka liengsuin, kaba kiew na New Delhi sha-Srinagar, kaba don palat 220ngut ki briew, ba kynthup ia U MP jong ka TMC, ka la hiar suk ha ka por 6.30 janmiet jong ka 21tarik Naitung, ha kaba ka shyntur (radome) jong katei ka liengsuin, ka la julor jur.
Ka liengsuiñ IndiGo kaba dang leit sha Srinagar kaba la ïakynduh ïa ka jingkhih ka lyeriong kaba jur ka la kyrpad ïa ka tnad pynïaid liengsuiñ jong ka thaiñ shatei lam mihngi (ATC), kaba don hapoh ka Indian Air Force (IAF), ba kan phai noh sha Pakistan jong ka tnat ATC jong ka Lahore ban lait na ka eriong. Kitei ki ar tylli ki jingkyrpad, ki la shah kyntait, ha kaba kila pynbor ia u nongniah liengsuin, ba un pyniaid ia ka liengsuin, ha katei ka lyeriong kaba jur, bad ban pynhap ia ka liengsuin (6E-2142) ha Srinagar, ong ka khubor jong ka Directorate General of Civil Aviation (DGCA).
Ki dur ba shyrkhei kiba la paw ha ki social media ki pyni ïa ka liengsuiñ A321 Neo kaba khih jur bha hapdeng ka eriong, kaba la pynjulor ïa ka Delhi-NCR bad Uttar Pradesh, ha kaba palat 50 ngut ki briew ki la ïap bad katto katne tylli ki dieng ki la shah rat tynrai. Ki video jong ki nongleit nongwan, kynthup ïa ki khynnah, kiba pyrta bad ïam namar ka jingtieng.
U DGCA u la iathuh ba katei ka liengsuin, ka dang iaid ha ka jingjrong kaba kumba 36,000 phut hajan ka Pathankot jong ka Punjab, ha kaba la ia tyngkhuh bad ka jinghap pyrthat bad u phria.
Da kaba mad ïa ka jingkhihwin kaba jur, ki nongtrei ki la kyrpad nyngkong ïa ka ATC ba shatei ban ailad ïa ka liengsuiñ ban phai noh sha u pud u sam jong ka pakistan, kaba dang shen ka la sakhi ïa ka jingïaleh pyrshah kaba jur bha hapdeng ka India bad ka Pakistan ha ka por jong ka Operation Sindoor. Hynrei ka Pakistan kala kyntait ia katei ka jingkyrpad.
Nangta u nongniah liengsuiñ u la pan jingbit na ka tnad pynïaid liengsuiñ jong ka Lahore (ATC) ban rung lyngkot sha ka suiñbneng jong ka Pakistan ban lait na ka jingshah lynshop ha ka eriong. Hynrei ia kata ruh kila kyntait .
U nongniah liengsuiñ ha kaba sdang u la pyrkhat ban leit phai biang sha Delhi, ong ka kyrwoh jong ka DGCA. Hynrei namar ba ka liengsuiñ ka kala jan poi artad sa tang katto katne minit , lada U leit phai biang ka la buh jingma ïa ka liengsuin namar ka jingjur palat ka lyeriong bad u pyrthad .kumta u nongniah liengsuiñ u la rai ban bteng shakhmat lyngba ka eriong kaba jur ban poi sha Srinagar ha ka lynti kaba lyngkot tam.