Ka Synjuk Seng Samla Shnong Shilliangum Zome, South West Khasi Hills District ha ryngkat ka jingiatreilang bad ka Hill Farmers Union (HFU) ka la pynlong ia ka career guidance seminar lane ka jingbtin lynti ia ki khynnah skul ha ki jingpule ba kham shajrong.
Ia kane ka seminar la pynlong ha Mawthawpdah Presbyterian Higher Secondary School ha kaba ki khynnah skul jong kane ka skul ki la wan ban iashim bynta.
Shuwa ban ai ia ka jingkren na u resource person bah Yowanmi Myria la ioh ia ka jingkren na u Bah Commander Shangpliang uba dei u President jong ka HFU Sengkmie uba la ai mynsiem ia ki khynnah skul ba kin don ia ka thong ha ka jingim jongki bad ki dei ruh ban don ia ka jingthmu kaei ki kwah ban long lane ban trei ha ia ka jingim jongki bad ba kin pynleit jingmut ban poi sha kata ka thong.
U la ong ruh ba wat la kiba bun ki dei kiba bun ki wan na ki longiing kiba duna ha ka ioh ka kot, hynrei ki dei ban buh thong ba kin wan shakhmat ha ki jingpule khnang ba kin pyndep ia ka jingthmu jongki ha ki jingpule lyngba ka jingkyrshan jong ki bank lane ka education loan.
La ioh ruh ia ka jingbatai na u Resource person bah Yowanmi uba la kdew lynti ia kiba bun ki lain pule na ka bynta kitei ki khynnah skul bad u la batai ruh halor kiba bun ki entrance exam kata katkum ki jingkwah pule jongki.
Ia ka jingialang la pyniaid da u Chairman jong ka Synjuk Seng Samla Shnong Shiliangum Zone samla Wallam Nongsiej, la ioh ruh ia ka jingkren ai kren pdiang na ka Principal jong ka skul lem bad ka jingkren aimynsiem bad kren ai khublei na u General Secretary jong ka synjuk u samla Moonlyroi Lyngdoh.
