Shillong 29 Jymmang – Ka jingker Sainar ha shilynter khappud India bad Bangladesh na ka jylla Meghalaya ka dang sahkut.
Na ka liang ka Sorkar India ka la bthah ia ka Sorkar jylla ban pyndep noh katkum ka por ba la buh. U Chief Secretary ka jylla Meghalaya u Bah Donald P. Wahlang u la ong U Myntri Rangbah ka Jylla u la ia kynduh ia ka Myntri Kam Pohïing jong ka Sorkar Pdeng, ha New Delhi myn ha ka Sngi Saitjaiñ ka 17 tarik u Jymmang.
U Myntri Rangbah u Conrad K. Sangma uba la ia kren halor ka mat ba kongsan kaba iadei bad ka jingker Sainar ha khappud ka Jylla Meghalaya i bad ka ri Bangladesh. Kane ka jingia kynduh ka dei namar ba don ki jingeh kiba iadei bad ka jylla jong ngi iathuh u Bah DP Wahlang.
Shuh shuh ki don ar tylli ki mat ba Iadei bad kane ka Kam pynsngew u Bah DP Wahlang
Banyngkong ki Mukotduma ha Iingkashari: Don ki bynta jong ka jaka ba dang don ha ka mukotduma ha High Court, kiba iadei bad ki jingia kynad halor ka khyndew. Ka sorkar jylla ka la kyrpad ia ka iingkashari ba kan ailad ban bteng ia ka jingtei ia ka fencing ha kine ki jaka wat dang don ha ka jingbishar, namar ka bynta kaba iadei bad ka jingshong suk bad ka jingshngain ha khappud.
Bynta ba ar ka jingpynshisha bad ka jingsiew Pisa: Don ki bynta kiba la dawa ban pynshisha shwa ban pyntrei ia ka kam. Kane ka la lah ban pyndep da ki Deputy Commissioner jong ka jylla, kiba la ai ia ki kot ki sla kiba donkam. Ngi kyrmen ba ka Sorkar Pdeng lyngba ka Ministry of Home Affairs kan siew noh mardor ia ka pisa kaba donkam ban sdang noh ka jingtei.
Don ruh ki nongshong shnong kiba pyrshah ba ka fencing kan long 150 meter na ka zero line. Ki kyrpad ba kan long beit ha ka zero line. Kane ka mat ka la don ha ka jingbishar jong ka Ministry of Home Affairs. Hynrei kane ka bynta ka long tang ka jaka rit bad ngim don jingeh palat halor kane iathuh u Chief Secretary.
U la bynrap kumba long mynta, ka jingjngai jong ka khappud ha jylla ka long kumba 443 kilometre, bad ka fencing ka la pyndep 60%. Ngi thmu ban pynkiew ia kane sha ka 75% haduh 80% shuwa ban kut une u snem. Ka sorkar jylla ka la pynlong 6 haduh 7 tylli ki jingialang bishar bniah, kiba bun na ki la long ha ka jingïalam jong u Myntri Rangbah hi.
Ka don ruh ka jingeh ha ki jaka kiba ym lah ban buh fencing—kum ha ki wah, khlaw, ne ki lum—ba ka terrain ka eh. Ha kine ki jaka, yn pynkiew ia ka jingpynkha jong ki BSF bad ki pulit ka jylla ban peitngor bha.
Nga la leit jurip da lade ha ki khappud bad ngan sa leit sha Shella shen ban peit bniah ia ka jinglong jingman. Ka jingïada ha khappud ka long kaba biang bha mynta bad ngim don kano kano ka jingma kaba kyrkieh. Ka BSF bad ka pulit ka jylla ki don ha ka jaka.