Ka Dr. M. Ampareen Lyngdoh, Myntri ka Tnat Rep, Sorkar Meghalaya, ka la plie paidbah ia ka Viksit Krishi Sankalp Abhiyan (VKSA) ha Krishi Vigyan Kendra, 5th Mile, Upper Shillong ha jingsynran ka kong B.M. Umlong (MAS), Director ka Tnat Horticulture, ka Sorkar Meghalaya,
Kum shi bynta jong ka jingpyrshang kaba khraw jong ka ri ban pynsngewthuh paidbah shwa ka Pre-Kharif Season sha ki nongrep ha kylleng ka ri, ka ‘Viksit Krishi Sankalp Abhiyan’ (VKSA) ka la sdang ha ka 29 tarik u Jymmang 2025 bad kan iai bteng haduh ka 12 tarik u Naitung 2025. Kane ka jingïaid lynti ka ri baroh kawei ka dei hapoh ka jingïalam jong u Myntri Rangbahduh ka Ri India, u Narendra Modi bad u Myntri ka Tnat Rep jong ka Ri India, Shivraj Singh Chouhan, kum ka jingpynkhreh kaba bniah shuwa ka Kharif Season.
Ha ka jylla Meghalaya, kane ka jingïalang kaba kyrpang ka la long ha Krishi Vigyan Kendra, East Khasi Hills, 5th Mile, Upper Shillong, ha kaba ka Dr. M. Ampareen Lyngdoh, Myntri ka Tnat Rep jong ka Sorkar Jylla, ka la long ka Kongsan bad ka la plie paidbah ia kane ka jingïaid lynti. La don ryngkat ha kane ka sngi ki ophisar na ka tnat Rep, Horticulture, AH & Vety, ICAR ATARI Zone 7, ki stad science na ka ICAR, CAU bad kiwei ki jaka ai jinghikai, bad ruh ki nongrep na ka distrik.
Haba kren ha kane ka sngi, ka Dr. Ampareen Lyngdoh ka la kyrpad ia ki nongrep ba kin shim bynta bad ban shim ia kane ka lad kum ka rukom ban kyntiew ia ka sap bad jingtip ha ka rep ka riang lyngba ka jingïatreilang bad ki stad rep kiba kin leit sha bun tylli ki shnong ha baroh 11 tylli ki block jong ka distrik.
Ka la kyntu ruh ia ki nongrep ban wanrah jingiatylli da kaba lum lang ia ki jaka rep (land holdings) ban lah ban pyni ia ka jaka kaba heh, khnang ba kin ioh jingmyntoi na ki skim sorkar. Ka Myntri ka la kdew ruh ia ka jingdonkam ban don ka policy kaba biang bad kaba dei bad ka rukom im jong ka jylla, kaba don ia ki rukom rep ba kyrpang bad ka terrain kaba pher.
Ki nongrep ki la shah kyntu ban pynduna ia ka jingpyndonkam palat palat ia ki dawai rep kiba dei ki chemical bad ban wad lad lyngba ka jingïatreilang bad ki stad rep ban rep da ka rukom ba long natural da ka jingpyndonkam ia u compost bad kiwei ki lad thymmai ba la wanrah da ka science.
Ka jingplie paidbah ka la kut da ka jingpyniaid paidbah ia ki kali kiba kit ia ki kynhun jong ki stad rep, ki official jong ki tnat sorkar bad ki nongtrei extension sha ki shnong bapher bapher.