Shillong, Jylliew 3: U Myntri Rangbah ka jylla, u Conrad K. Sangma, u la pynphai ïa ki Hello Meghalaya Grants sha ki nongpynïaid phlim ban ai jingïarap bad kyntiew ïa ka sap jong ki nongthoh bad nongpynmih phlim ha ka jylla.
Kane ka jingai jingkyrshan ka long ban ai mynsiem bad kyntiew ïa ka sap jong ki samla ka jylla bad ban kyntiew ïa ka jingïaid shaphrang jong ka film industry ha Meghalaya.
U Conrad lem bad u Myntri ka Tnat jngohkai pyrthei, u Paul Lyngdoh, ki la pynphai ïa kine ki grant sha ki nongpynïaid phlim, kaba dei ka jingïatylli ha ka skhim Hello Meghalaya.
U Myntri Rangbah u la ong ba ha kine ki snem kiba la leit, ka sorkar ka la sngewthuh ïa ka jingkongsan ban phai sha ka pateng samla, namar haduh 50% jong ki paidbah ka jylla ki don hapoh 20 snem ka rta — kaba pynlong ïa ka jylla Meghalaya kum kawei na ki jylla kaba rit rta tam ha India.
U la kdew ruh ba ka jylla Meghalaya ka don ka bor bad ka sap ban kyntiew ïa ka film industry, khamtam da ka jingïadon jong ki riewshemphang ha ka thoh ka tar bad ki lynti kum ka “Hello Meghalaya”.
Ki Kyrdan jong ka Grant:
Ka jingai jingkyrshan ka don ha saw tylli ki kyrdan – A, B, C bad D.
Category A: 6 ngut ki nongpynïaid phlim kiba la shah jied ki la ioh haduh ₹35 lak ban pynmih kawei ka feature film ha ka shisnem.
Category B: 18 ngut ki nongpynïaid phlim ki la ioh haduh ₹25 lak ban pynmih feature film.
Category C: 4 ngut ki nongpynïaid phlim ki la ioh ₹20 lak, ban pynmih web series (da ka episode), kiba dei ban don kumba 10 tylli eiei, bad man ka episode 30-40 minit ka jingjrong.
Category D: 19 ngut ki nongpynïaid phlim ba thymmai na Meghalaya ki la ioh haduh ₹5 lak ban pynmih short film.
U Paul Lyngdoh u la ong ba kane ka jingïalang ka kyntiew shakhmat ïa ka kynhun film ha Meghalaya bad ka rakhe ruh ïa ka jingïatylli jong ki Khasi, Jaintia bad Garo. U la pynpaw ïa ka jingsngewkmen halor ka platform Hello Meghalaya kaba la trei bha naduh ba la plie paidbah ïa ka.
U la khot ïa ki paidbah ban ai jingmut halor ka Meghalaya Film Tourism Policy (Draft) ba la pynbna ha kane ka sngi.
Jingpyni Ba Nyngkong jong “Ha Lyngkha Bneng”
Ha kane ka jingïalang la pyni paidbah ruh ka jingpyni ba nyngkong (first look) jong ka phlim “Ha Lyngkha Bneng” (The Elysian Field), kaba la pynïaid da u Pradip Kurbah.
Exchange Programme ha ka Film Making
La pyntip ruh halor ka Filmmaking Exchange Programme ha kaba ka Tnat Jngohkai Pyrthei ka jylla Meghalaya ha ka jingïatreilang bad ka Film and Television Institute (FTI) na Arunachal Pradesh kin pynlong ki masterclass kiba kin ai da u Dominic Sangma, uba dei u Director ba la akor bad ioh nam ha ka ri India. Kane ka program ka don ka jingïashim bynta jong ki 30 ngut ki samla pule – 15 ngut na Meghalaya bad 15 ngut na Arunachal Pradesh.
Road Show bad Flag-off
La pynkut ïa kane ka jingïalang da ka road show bad ka flag-off ceremony da u Myntri Rangbah. Kane ka road show kan kynthup ïa ki phlim, jingpynbna, jinghikai bad jingai jingtip halor ki mat ba kongsan – kiba yn pyni ha ki bynta bapher bapher jong ka jylla ha ki 30 sngi.
Meghalaya Film Tourism Policy 2025
Ban kyntiew ïa ka ioh ka kot ha ka liang ka “creative economy” bad ban pynlong ïa Meghalaya kum ka jaka jngohkai phlim kaba heh tam ha Ri India, u Myntri Rangbah bad u Myntri jngohkai pyrthei ki la pynbna paidbah ïa ka Draft Meghalaya Film Tourism Policy 2025.