Shillong: U Myntri Rangbah ka jylla Meghalaya, u Conrad K. Sangma, ha ka sngi Balang, u la kren shai halor ki mat kiba iadei bad ka roi ka par ha sor Shillong, khamtam eh ban pyllait na ka jingdheng kali. bad jingkhapngiah ka Sorkar ka thmu ban pynkylluid.
U la ong ba ka sorkar ka la pynmih tender ha bun bynta kum ha Barik Point bad Mawkdok View Point. Hynrei ha ka sien kaba nyngkong ym shym la don kiba aplai shibun, namar ba ki design kiba la buh ki long kiba kham eh bad kham pyrkhat sani. “Ngi la tender bun bynta hynrei ha ki khyndiat kynta ba nyngkong ym don mano mano ba wan. Ka daw ka dei namar ba ki design ki long kiba kham modern bad kham eh, ym kum ka rukom ba ju leh man ka por,” la ong u Conrad.
U la ong ba mynta la sdang biang da ka sien kaba ar bad ka jingwan kyrshan na ki briew ba don sap na kylleng ka ri ka la nang kiew. “Mynta ki briew ba stad bad kiba tip bha ki la sdang ban wan, bad ki ia treilang bad ki contractor jong ngi ha Meghalaya. Kane ka dei ka jingkylla kaba bha,” u la bynrap. U la ban jur ruh ba ki contractor na jylla ki dei ban pynshlur ban kiew shaphrang bad ka sorkar ka kwah ruh ba ki nongtrei na bar ki ai jingtip bad jingstad ha ka technology bad design.
Haba iadei bad ka jingkhanglad jingiaid kali ha sor, u la ong ba ka sorkar ka la leh bun ki lad kum ka jingpynkhlaiñ ia ki jaka ieng, ka jingpynlong kyndon halor ki jaka ban niah bad ban pynlong katto katne ki jaka kum ki “no-exit zone.” Hynrei u la pynshai ba kine ki long tang ki lad shipor.
“Ar tylli ki lad kiba shisha ban pynbeit ia kane ka mat, ka long – kawei, ban pynkynriah ia ki office bad ki jaka trei jong ka sorkar na ka sor; bad kaba ar, ban pynbha shuh shuh ia ka system public transport. Kane kadei kaba ngi peit kum ka thong kaba heh tam,” la ong u Myntri Rangbah.
U la kdew ruh ba ka plan ban pynkynriah ia ki ophis sorkar na Secretariat sha ka jaka ba thymmai ka lah ban long ka “game changer” kaba heh tam. “Lada ngi lah ban pynkynriah ia ka Secretariat, ka jaka ba ngi ioh na katei ka thain kan ailad ia ngi ban pyniar ia ki surok, wat lada tang da 5 ne 10 meter. Ngi lah ruh ban shna surok ia ki nongiaid da cycle,” u la ong.
U la pynpaw ba ha ka por ba yn tei ia ki project kum kitei, yn sa mih shibun ki jingeh ha ki surok bad ka traffic congestion. Hynrei u la khmih lynti ba hadien, kan long ka jingmyntoi kaba shisha ha ka ban pynbha ia ka roi ka par ha sor.
“Ka don bun ki jingeh bad jingtyrwa kiba ngi iakynduh, hynrei da ka plan ba ngi don mynta, ngan khmih lynti ba ngi lah ban wanrah ia ka roi ka par kaba khraw. Kato ka por kan shimpor, hynrei ki lad temporary ngi la sdang. Ki parking lot ki la sdang ban tei, ki kyndon niah kali la pynkhlaiñ ha ki bynta bapher bapher. Katto katne ki treikam, katto katne kim treikam, hynrei ngi hap ban bteng ban pyrshang,” la pynkut u Conrad K. Sangma.