Ioh jaka ka Nongstoin ia ka Rehabilitation Centre bad jurip u MLA bad ka DREAM

Nongstoin, , 2025:
Ha ka sien jam kaba donkam ban pynkhlaiñ ïa ka jingïakhun pyrshah ïa ka jingkyrni ia u drok, u Mission Director jong ka Drug Reduction Elimination and Action Mission (DREAM), Bah F.G. Kharshiing ryngkat bad u MLA jong ka Nongstoin constituency, u Bah Gabriel Wahlang, u Deputy Commissioner jong ka West Khasi Hills, ki la ïalam ïa ka jingjurip lang ïa kawei ka ïing sorkar kaba don ha Upper New Nongstoin ban peit bniah ïa ka jinglah ban pynkylla ïa kane ka jaka kum ka Rehabilitation Centre. Kane ka projek ka dei ka jingïatehlok hapdeng ka Urban Mission, New Nongstoin Presbyterian Church bad ka DREAM.
La synran lang ïa u Mission Director da i District Social Welfare Officer, u District Agriculture Officer, ki dkhot jong ka Urban Mission, New Nongstoin Presbyterian Church, bad ki nongïalam shnong.
Ka jingjurip ka dei ban bishar bniah ïa ka jinglah jong ka jaka haba iadei bad ka rukom shna bad ka jingdonkam kyrkieh ban tei ïa ka Rehab Centre ha katei ka thaiñ. Kane ka sienjam ka la wanrah ïa ka jingïaroh bad ka jingïatreilang na baroh ki nongshim bynta, kaba pyni ba ka jingïatreilang kadei ka lynti ban ïakhun pyrshah ïa ka jingkiew jong ka jingkyrni u drok ha ka district.
Ha kane ka sngi, u MLA Bah Gabriel Wahlang u la ai ka jingïaroh ïa ka jingtrei shitom jong ka Urban Mission bad ka DREAM halor kane ka rukom pyrkhat ban tei ïa kane ka jaka sumar kaba long kaba donkam tam. U la kyntu ruh ba ka jingïatreilang ka long kaba donkam tam ban ïaleh pyrshah ïa ka jingkyrni u drok bad u la khmih lynti ba kane ka Rehab Centre kan long kum ka jaka ba ai jingkoit jingkhiah ia kiba la ngop ha kane ka apot. U la pynpaw ruh ïa ka jingsngewkmen halor kane ka sienjam kum ka bynta ban tei ïa ka imlang sahlang kaba koit ba khiah bad kaba lah ban ïakhun pyrshah ïa kane ka jingeh, bad u la kular ban ai ka jingïarap bad jingkyrshang ba pura.
Kane ka sienjam ka long shibynta bynta jong ka DREAM ban wanrah ïa ka jingsumar kaba paka bad pura sha ki paidbah lyngba ki Rehab Centre ha ki district baroh.