Shillong, 9 Jylliew: Da ki taiew tam ki pulit ka Meghalaya kiba la hiar sha ki riat ki ram jong ki jaka Jngohkai pyrthei naduh Sohra Rim shaduh Nongriat ban wad ia ka tnga u Raja Raghuvanshi ba ka la jah hadien ka jingïap u Raja Raghuvanshi.
Ka khubor kaba la ai da ki pulit ba ka Sonam kaba long ka tnga jong u, ka la leit ban aiti noh ialade ha Nandganj Police Station ha Gazipur District, Uttar Pradesh, ha ka miet sngi U Blei.
Katkum ka jingïathuh da ki pulit, la ioh kem ïa uwei na ki briew ba donkti na Uttar Pradesh, katba ar ngut pat la iohkem na Indore, Madhya Pradesh. Ka jingpyrshang ban iohkem ïa uwei pat uwei u briew ba dang sah leit pahara da ki pulit ka dang ïaid shakhmat.
Na liang u Myntri Rangbah ka jylla Meghalaya, u Conrad K. Sangma, u la pynpaw ka jingïaroh ïa ki pulit ka jylla ba ki la trei shitom.
U Conrad K. Sangma ha ka rynsan tweet jong u, u ong: Ha shwa 7 sngi, ka Meghalaya Police ka la wanrah ka jingjop kaba khraw ha ka case jingïap u Raja. La iohkem 3 ngut ki briew na Madhya Pradesh, ka kynthei ka la surrendar bad ka jingtohkit ban iohkem ïa uwei pat ka dang ïaid. Ka la bha shisha ka Meghalaya Police.”